Xiva shahrida «Xorazm xonlarining milliy taomlari» xalqaro gastronomiya festivali bo‘lib o‘tdi

Toshkent, O‘zbekiston (UzDaily.uz) — 2025 yil 20–21 sentyabr kunlari «Arda Xiva» majmuasida Xorazmning boy kulinar merosini targ‘ib qilishga bag‘ishlangan «Xorazm xonlarining milliy taomlari» xalqaro gastronomiya festivali bo‘lib o‘tdi.

Festival 2024 yil 18 noyabrdagi O‘zbekiston Respublikasi Prezidentining qarori (№ PQ-394) asosida Xorazm viloyatining turistik salohiyatini rivojlantirishga qaratilgan tadbirlar doirasida tashkil etildi.

Forumning asosiy maqsadi — Xorazm oshxonasining o‘ziga xos anʼanalarini xalqaro maydonda namoyish etish, gastronomik turizm rivoji uchun yangi imkoniyatlar yaratish va mahalliy hamda xorijiy sayyohlar oqimini oshirishdan iborat bo‘ldi. Asrlar davomida shakllangan Xorazm oshxonasi O‘zbekistondan tashqarida ham yaxshi tanilgan bo‘lib, festival uni yana-da ommalashtirish yo‘lidagi muhim qadam bo‘ldi.

Festival dasturiga quyidagilar kiritildi: milliy taomlarning qadimiy retseptlaridan tortib zamonaviy talqinlarigacha bo‘lgan degustatsiyasi, anʼanaviy taomlar tayyorlash bo‘yicha master-klasslar, milliy raqslar, konsertlar va DJ ishtirokidagi musiqiy shoulardan iborat folklor va madaniy chiqishlar, gastronomik turizm istiqbollari muhokamasiga bag‘ishlangan ilmiy-amaliy konferensiya.

Tadbirda mintaqadagi restoranlar va gastronomiya loyihalari qatnashib, sayyohlarni Xorazmning boy anʼanalari bilan tanishtirdi. Festivalga mahalliy va xorijiy OAV vakillari, blogerlar va gastronomiya sohasi ekspertlari taklif etildi.

Tadbirning ishbilarmonlik jihatiga alohida eʼtibor qaratildi: festival umumiy ovqatlanish korxonalari va turizm biznesi subyektlari o‘rtasida hamkorlik o‘rnatish, yangi shartnomalar tuzish va qo‘shma loyihalarni amalga oshirish maydoniga aylandi.

Bayram yakunlanishida tanlov o‘tkazilib, ishtirokchilarning eng yaxshi taomlari O‘zbekiston Oshpazlar Assotsiatsiyasi ekspertlari tomonidan baholandi va g‘oliblar turli nominatsiyalar bo‘yicha mukofotlar bilan taqdirlandi.

Festival mehmonlarni Xorazm sanʼat ustalari, qo‘shiqchi va musiqachilar ishtirokidagi konsert dasturi bilan ham xursand qildi.

«Xorazm xonlarining milliy taomlari» xalqaro festivali mehmonlarga betakror gastronomik va madaniy tajriba ulashib, Xorazm va butun mamlakatning turistik jozibadorligini yana bir bor namoyon etdi.