Toshkent, O‘zbekiston (UzDaily.uz) — Turizm qo‘mitasida Xitoyning “Loong Air” aviakompaniyasi vakillari Xalqaro ishlar bo‘yicha vitse-prezidenti S.Vang, Xalqaro ishlar bo‘yicha direktori N.Chjou va Toshkentdagi vakolatxonasi bosh direktori A.Xudaybergenova bilan uchrashuv bo‘lib o‘tdi.

Aviakompaniya 2023-yildan buyon O‘zbekistonda muvaffaqiyatli faoliyat yuritib, “Toshkent – Sian”, “Samarqand – Sian” va “Toshkent – Chendu” yo‘nalishlari bo‘yicha haftasiga uch marta to‘g‘ridan-to‘g‘ri reyslarni amalga oshirib, mamlakatlar o‘rtasida turizm va ishbilarmonlik almashinuvini rivojlantirishga hissa qo‘shmoqda.

Uchrashuvda tomonlar O‘zbekiston va Xitoy o‘rtasidagi sayyohlik va iqtisodiy aloqalarni mustahkamlash yo‘lida hamkorlikni kengaytirish istiqbollarini, jumladan parvozlar sonini ko‘paytirish va yangi yo‘nalishlarni rivojlantirish masalalarini muhokama qildilar.