Toshkent, O‘zbekiston (UzDaily.uz) — Toshkent shahrida Xalqaro bolalarni himoya qilish kuniga bag‘ishlangan «Bolalar uchun muloqot: Markaziy Osiyo va YUNISEF» mintaqaviy forumi bo‘lib o‘tdi. Bu haqda Zamin jamg‘armasi matbuot xizmati xabar berdi.

Forum onalar va bolalarga tibbiy xizmat ko‘rsatish sifatini yaxshilash, umumiy ustuvor yo‘nalishlarni belgilash, samarali strategiyalarni muhokama qilish orqali xalqaro hamkorlikni mustahkamlash uchun maydonga aylandi. Ayniqsa, birinchi bosqich tibbiy-sanitariya yordamini rivojlantirish hamda bolalar onkologiyasi sohasida multidissiplinar yondashuvni joriy etish masalalariga alohida eʼtibor qaratildi.

Forumda YUNISEF, Sog‘liqni saqlash jahon tashkiloti (SJT), BMT, Qozog‘iston, Qirg‘iziston, Tojikiston, Turkmaniston, O‘zbekiston, Ozarbayjon sog‘liqni saqlash vazirliklari va Zamin jamg‘armasi rahbarlari ishtirok etdi.

Zamin jamg‘armasi Kengashi raisi Ziroat Mirziyoyeva o‘z murojaatida shunday dedi:

«Biz har bir bolaning sog‘lig‘i va farovonligini taʼminlash bo‘yicha tizimli ishlarni davom ettirishga qatʼiy bel bog‘laganmiz. Ayniqsa, pediatriya tizimi doirasida onkologik kasalliklarga qarshi kurash dasturlarini joriy etishda multidissiplinar yondashuvni qo‘llashga katta eʼtibor qaratmoqdamiz. Eng katta muvaffaqiyatimiz — bu xursand bolalarning kuligu, ota-onalarning xotirjamligi va ishonchidir».

Markaziy Osiyo davlatlari bolalar sog‘lig‘ini muhofaza qilish bo‘yicha xalqaro standartlarga sodiqligini yana bir bor tasdiqlab, birinchi bosqich tibbiy-sanitariya yordamini mustahkamlashni barqaror sog‘liqni saqlash tizimiga olib boruvchi asosiy omil sifatida qayd etdi.

YUNISEF ijrochi direktori Ketrin Rassel shunday taʼkidladi:

«Markaziy Osiyoda sog‘liqni saqlash tizimlari infeksion bo‘lmagan kasalliklar va onalik hamda bolalar o‘limi kabi muammolarga duch kelmoqda. Birlamchi tibbiy yordamni kuchaytirish eng samarali va to‘g‘ri strategiya hisoblanadi».

Forumning muhim qismlaridan biri bolalar va o‘smirlar uchun onkologik yordam tizimini yaxshilashga bag‘ishlandi. Ushbu yordam davlat dasturlari tizimiga integratsiya qilingan, profilaktika, erta diagnostika va davolashni o‘z ichiga olgan, malakali mutaxassislar, psixo-ijtimoiy ko‘mak va raqamli monitoring bilan taʼminlangan bo‘lishi lozim.

Klinik yordamdan tashqari, bola uchun oilaviy va ijtimoiy muhitda qo‘llab-quvvatlashni taʼminlovchi ota-onalarga taʼlim berish, o‘zaro yordam guruhlari va oilaviy maslahat xizmatlari ham joriy etilishi kerak.

SJTning Yevropa mintaqaviy byurosi direktori Hans Klyuge o‘z so‘zida shunday dedi:

«Bolalarning sog‘lig‘i — bu xalqimizning sog‘lig‘i. Bu inson kapitaliga, ijtimoiy barqarorlikka va kelajakni qurishdagi eng kuchli investitsiyadir. SJT har doim bu yo‘lda sizlar bilan birga bo‘lishga tayyor».

Forumda bolalar saratoniga qarshi kurash bo‘yicha Akademik xalqaro xab yaratish g‘oyasi alohida eʼtiborga olindi. Xabning Kengashiga qatnashchi mamlakatlar rahbarlari kiritildi. Bu tashabbus mintaqada ilg‘or xalqaro amaliyotlarni klinik va ilmiy faoliyatga joriy etishni tezlashtirishga qaratilgan.

YUNISEF va SJT ko‘magida Markaziy Osiyo davlatlari bolalar va o‘smirlar sog‘lig‘ini muhofaza qilish sohasida hukumatlar, akademik jamoatchilik, hamkorlar va fuqarolik jamiyati o‘rtasida hamkorlikni rivojlantirish bo‘yicha deklaratsiyani qabul qildi.