Toshkent, O‘zbekiston (UzDaily.uz) — Joriy yilning 24 fevral–1-mart kunlari Toshkent shahrida Iqtisodiyot va moliya vazirligi hamda Turkiya hamkorlik va muvofiqlashtirish agentligi (TIKA) bilan hamkorlikda Turkiyaning shisha va zargarlik mahsulotlarini ishlab chiqarish sohasi yetakchi ekspertlarining O‘zbekistonga tashrifi amalga oshirilmoqda. Tashrif doirasida turkiyalik mutaxassislar tomonidan ilk marotaba mahalliy korxonalar mutaxassislarning malakasini oshirishga qaratilgan o‘quv-seminarlar o‘tkazilmoqda.

Mazkur o‘quv-seminarlar 2024-yil iyun oyida Anqara shahrida bo‘lib o‘tgan O‘zbekiston-Turkiya o‘rtasidagi Strategik sheriklik kengashining 3-yig‘ilishi doirasida ikki mamlakat davlatlari rahbarlari o‘rtasida erishilgan kelishuv ijrosini ta’minlash maqsadida tashkil etilmoqda.

Xususan, tomonlar o‘rtasida O‘zbekiston sanoatining 6 ta sohasini Turkiya ilg‘or tajribasi asosida rivojlantirish va dastlabki bosqichda O‘zbekistonda turk standartlari asosida mahalliy soha mutaxassislari malakalarini oshirish bo‘yicha kelishuvga erishilgan.

Hozirda O‘zbekistonda maishiy shisha mahsulotlariga katta talab mavjud. Bu sohadagi salohiyatdan keng foydalanib, mamlakat ichki ehtiyojlarini to‘liq qondirish, eksport quvvatlarini kuchaytirish maqsad qilingan.

Treninglar davomida turkiyalik ekspertlar ishlab chiqarish samaradorligi, mahsulot sifati hamda eksport salohiyatini oshirish borasidagi bilim va tajribalarini mahalliy soha mutaxassislari bilan bo‘lishmoqda.

O‘quv-amaliy seminarlar shisha ishlab chiqarishda sifatni oshirish hamda ilg‘or usullarni qo‘llagan holda ularga tashqi ishlov berish, texnolog va kimyogarlarni Turkiya tajribasi bilan tanishtirish yo‘nalishlarini o‘z ichiga olgan.

Treningda maishiy shisha ishlab chiqarish sohasiga ixtisoslashgan “ASL OYNA”, “KVARTS”, “ZARAVSHON OYNA”, “MINGYUAN SILU INDUSTRY” kabi yirik va boshqa korxonalar vakillari ishtirok etmoqda.

Zargarlik mahsulotlarini ishlab chiqarish o‘quv mashg‘ulotlari bilan bir qatorda dastur doirasida Iqtisodiyot va moliya vazirligi hamda Zargarlik sanoati uyushmasiga 3D printeri grant asosida, beg‘araz ko‘mak sifatida taqdim etilishi kutilmoqda.

Zargarlik bo‘yicha o‘quv mashg‘ulotlarida O‘zbekistonda ushbu sohada faoliyat yuritayotgan “CARAVAN SILVER”, “NUR STAR JEWERLY”, “SOFIZAR”, “GLOBAL UNIVERSAL SERVIS” kabi korxonalar vakillari qatnashmoqda.

Ushbu o‘quv dasturi zargarlik sanoatida innovatsion yondashuvlarni tatbiq etish, milliy dizayn an’analarini zamonaviy texnologiyalar bilan uyg‘unlashtirish hamda xalqaro maydonda O‘zbekiston zargarlik mahsulotlarini raqobatbardosh darajaga olib chiqishga qaratilgan.

O‘zbekistonlik mutaxassislar mazkur o‘quv treninglarida olgan bilimlarini mahalliy korxonalarda faol qo‘llab, ishlab chiqarish jarayonida yangi tajribalardan foydalanish imkoniyatiga ega bo‘ladi. Bu bilan mahalliy mahsulotlarning nafaqat ichki bozor, balki xalqaro maydonlardagi raqobatbardoshliligini ta’minlash bo‘yicha ham katta imkoniyatlar yaratiladi.

Treninglar yakunida ishtirokchilarga TIKA tomonidan maxsus sertifikatlar topshirilishi kutilmoqda. Shuningdek, joriy yilning aprel oyida mahalliy soha mutaxassislari uchun Turkiyaga safar tashkil etib, maishiy shisha mahsulotlari va zargarlik buyumlarini ishlab chiqarishga ixtisoslashgan korxonalar faoliyati bilan yaqindan tanishish rejalashtirilgan.