Tramp Bagram aviabazasi ustidan nazoratni qaytarish niyati borligini bildirdi

Toshkent, O‘zbekiston (UzDaily.uz) — AQSH Prezidenti Donald Tramp Vashingtonning Afg‘onistondagi Bagram aviabazasi ustidan nazoratni qayta tiklash niyati borligini maʼlum qildi.

Buyuk Britaniya Bosh vaziri Kit Starmer bilan o‘tkazilgan qo‘shma matbuot anjumanida Tramp AQSH avval bazani “Tolibon”ga deyarli topshirganini va hozirda uni qaytarib olish bo‘yicha choralar ko‘rilayotganini taʼkidladi.

«Biz uni qaytarib olishga harakat qilyapmiz, chunki ular bizdan nimadir istashadi. Biz bu bazani qaytarib olmoqchimiz», — dedi prezident. Uning aytishicha, asosiy sabablardan biri — Bagramning strategik joylashuvi bo‘lib, u Xitoydagi yadro quroli ishlab chiqarish obyektlaridan bir soatlik masofada joylashgan.

Sovet davrida qurilgan Bagram aviabazasi 2001 yilda Afg‘onistondagi harbiy operatsiya boshlanganidan beri AQSH qo‘shinlari tomonidan foydalanib kelingan. 2021 yilda AQSH qo‘shinlari chiqib ketgach va Afg‘oniston hukumati ag‘darilgach, baza “Tolibon” nazoratiga o‘tdi.

Harakat vakillari AQSH qo‘shinlarini qaytarishga tayyor emasliklarini bildirib, uning o‘rniga o‘zaro hurmat tamoyillari asosida iqtisodiy va siyosiy hamkorlikni taklif qilmoqda.

Vashington hanuz “Tolibon”ni Afg‘onistonning rasmiy hukumati sifatida tan olmagan va ular bilan ommaviy muloqotni cheklab kelmoqda, asosan amerika fuqarolarini ozod qilish masalalari bo‘yicha muzokaralar bilan kifoyalanmoqda.

CNN maʼlumotlariga ko‘ra, Bagramni qaytarish masalasi Tramp maʼmuriyatida kamida mart oyidan beri muhokama qilib kelinayotgan bo‘lib, maqsadlar qatoriga Xitoy ustidan strategik kuzatuv, konchilik sohasiga kirish imkoni, ISHIDga qarshi kurash va diplomatik missiyani qayta tiklash imkoniyati kiradi.

Biroq bunday har qanday qadamlar AQSH qo‘shinlarining qaytib joylashishini talab qiladi, bu esa 2020 yilda tuzilgan qo‘shinlarni to‘liq chiqarib ketish bo‘yicha kelishuvga zid hisoblanadi.