Toshkentning Sergeli tumanida avtobus yonib ketdi — jabrlanganlar yo‘q

Toshkent, O‘zbekiston (UzDaily.uz) — Toshkent shahri Sergeli tumanida 18 fevral kuni avtobusda yong‘in sodir bo‘ldi, deb xabar berdi poytaxt favqulodda vaziyatlar boshqarmasi matbuot xizmati.

Yangi Sergeli ko‘chasidagi yong‘in haqida xabar soat 12:02 da kelib tushgan. Yong‘in-qutqaruv bo‘linmalari voqea joyiga soat 12:07 da, yaʼni besh daqiqadan so‘ng yetib borgan, yong‘in esa 12:09 da to‘liq bartaraf etilgan.

FVB maʼlumotlariga ko‘ra, hodisa oqibatida hech kim jabrlanmagan. Yong‘in shaharning 4-avtoparkiga tegishli avtobusda yuz bergan.