Toshkentda yashil hududlar va bolalar maydonchalarida yuzlab noqonuniy qurilishlar aniqlandi

Toshkent, O‘zbekiston (UzDaily.uz) — Toshkent shahrida yashil hududlar, bolalar va sport maydonchalarida yuzlab holatlarda noqonuniy qurilishlar aniqlandi.

Joriy yil iyun oyida Prezident Shavkat Mirziyoyev ushbu hududlarni avvalgi holatiga qaytarish vazifasini qo‘ygan edi. Yer maydonlaridan foydalanish ustidan nazorat va tekshiruv ishlari Bosh prokuratura, Adliya vazirligi, “O‘zbekkosmos” va Kadastr agentligiga yuklatilgan.

«O‘zbekiston 24» telekanali xabariga ko‘ra, yer maydonlarini qaytarish bo‘yicha keng ko‘lamli ishlar olib borilmoqda. Bosh prokuratura boshqarmasi prokurori Mansur Ro‘zimovning so‘zlariga ko‘ra, ishchi guruhlar hududlarni tiklash bo‘yicha choralar ko‘rmoqda.

Jumladan, Mirzo-Ulug‘bek tumanida yerdan noqonuniy foydalanishning 56 ta holati aniqlandi. Ularning biri — 27 sotix maydon prokuratura qarori bilan davlat zaxirasiga qaytarildi, ikki jinoyat ishi qo‘zg‘atildi va dastlabki tergov ishlari olib borilmoqda.

Umuman olganda, Yunusobod, Yakkasaroy va Mirzo-Ulug‘bek tumanlarida shunga o‘xshash 374 ta holat aniqlandi va har biri bo‘yicha o‘rganish ishlari olib borilmoqda.

“O‘zbekkosmos” agentligi 2018–2019 yillarda olingan aero-kosmik suratlarni hozirgi tasvirlar bilan taqqoslab, aniqlangan qoidabuzarliklarni prokuratura organlariga taqdim etmoqda. Agentlik vakili Saidmurod Saidxo‘jayev taʼkidlaganidek, tahlil natijasida yer to‘g‘risidagi qonunchilikning ko‘plab buzilishi holatlari qayd etilgan.

Ishchi guruhlar shunday tekshiruvlarni poytaxtning barcha tumanlarida hamda respublika hududlarida davom ettiradi.