Toshkentda poyezd bilan bog‘liq go‘yoki sodir bo‘lgan hodisa haqidagi videorolik sahnalashtirilgan bo‘lib chiqdi

Toshkent, O‘zbekiston (UzDaily.uz) — «O‘zbekiston temir yo‘llari» AJ Toshkent shahrining Mirobod tumanida go‘yoki poyezd odamni bosib ketgani haqida tarqalayotgan maʼlumotni rad etdi. Ijtimoiy tarmoqlarda ushbu voqea aks etgan videorolik tarqalmoqda, biroq u haqiqatga mos kelmaydi.

Maʼlum bo‘lishicha, ushbu kadrlar O‘zbekiston Transport prokuraturasi tomonidan ommaviy axborot vositalari vakillari bilan hamkorlikda tashkil etilgan «Temir yo‘lda o‘lim» nomli rejali profilaktik tadbir doirasida tasvirga olingan.

Kompaniya internet foydalanuvchilarini maʼlumotlarni tarqatishdan oldin ularning ishonchliligini tekshirishga chaqirib, jamoatchilikni chalg‘itmaslikni so‘radi.