Toshkentda Koreya Biznes Kengashining yig'ilishi bo'lib o'tdi

Toshkent, O‘zbekiston (UzDaily.uz) — O‘zbekiston Respublikasi Investitsiyalar, sanoat va savdo vaziri o‘rinbosari Ilzat Kasimov O‘zbekiston Respublikasidagi Koreya Respublikasi Elchixonasi bilan hamkorlikda tashkil etilgan Koreya biznes kengashining navbatdagi yig‘ilishida ishtirok etdi.

Tadbirda vazirlik va idoralar, diplomatik korpus vakillari, koreys kompaniyalari hamda biznes doiralari, shuningdek xalqaro moliya institutlari - Osiyo taraqqiyot banki va Jahon bankining mintaqaviy ofislari vakillari ishtirok etdi.

Uchrashuv davomida ishtirokchilar O‘zbekistonda koreys biznesi ishtirokida amalga oshirilayotgan investitsiya loyihalarining joriy holatini, shuningdek ularni amalga oshirish jarayonida yuzaga kelayotgan qator amaliy masalalarni muhokama qildilar. Xususan, loyihalarning infratuzilma ta’minoti hamda ixtisoslashtirilgan texnikani olib kirish uchun bojxona sharoitlarini takomillashtirish masalalari ko‘rib chiqildi.

O‘zbekiston tomoni alohida ravishda joriy yilda Koreya Respublikasida o‘tkazilishi rejalashtirilgan tadbirlar doirasida investitsiya kun tartibini birgalikda ishlab chiqish muhimligini ta’kidladi.