Toshkentda bolani balkon panjarasiga o‘tirgizib video olgan ayol yuzasidan tekshiruv boshlandi

Toshkent, O‘zbekiston (UzDaily.uz) — O‘zbekiston poytaxtida huquqni muhofaza qiluvchi organlar ko‘p qavatli turar joy binolaridan birining yettinchi qavatida ayol kishi voyaga yetmagan bolani balkon panjarasiga o‘tirgizib, sodir bo‘layotgan holatni videoyozuvga olgan hodisa yuzasidan tekshiruv olib bormoqda.

Toshkent shahar Ichki ishlar bosh boshqarmasi maʼlum qilishicha, mazkur video avval ijtimoiy tarmoqlarda tarqalgan. Kadrlarda ayol kishi balkon panjarasi ustida balandlikda o‘tirgan qizni tasvirga olayotgani, so‘ngra rolikni internetda eʼlon qilgani aks etgan.

Ichki ishlar organlari xodimlari ayolning shaxsini tezkorlik bilan aniqlagan. IIBB maʼlumotiga ko‘ra, u ruhiy holatini baholash va psixiatriya ekspertizasidan o‘tkazish uchun tibbiyot muassasasiga yo‘naltirilgan.

Idora taʼkidlashicha, hodisa oqibatida bolaning sog‘lig‘iga zarar yetmagan. Qizaloq qarindoshlari qaramog‘iga topshirilgan.

Ayni vaqtda mazkur holat yuzasidan dastlabki tergovga qadar tekshiruv ishlari olib borilmoqda, uning yakunlariga ko‘ra ayolning harakatlariga huquqiy baho beriladi.