Toshkentda avtobus ajratilgan yo‘lakda 13 yoshli qizchani urib ketdi

Toshkent, O‘zbekiston (UzDaily.uz) — Toshkent shahrida 18-sonli avtobus Shota Rustaveli ko‘chasida ajratilgan yo‘lakda 13 yoshli qizchani urib ketdi. Hodisa 2 aprel kuni soat 12:40 atrofida sodir bo‘lgan. Voqea joyidan olingan foto va videolar ijtimoiy tarmoqlarda tarqaldi.

“Toshshahartransxizmat” kompaniyasi maʼlum qilishicha, transport vositasini 51 yoshli haydovchi boshqargan bo‘lib, uning umumiy mehnat staji 25 yilni tashkil etadi, shundan bir yili mazkur tashkilotda faoliyat yuritgan.

Dastlabki maʼlumotlarga ko‘ra, qizcha yo‘lni piyodalar o‘tish joyidan tashqarida va svetoforning taqiqlovchi signalida kesib o‘tgan.

Haydovchi jabrlanganga birinchi tibbiy yordam ko‘rsatib, tez tibbiy yordam brigadasini chaqirgan. Voqea joyiga yetib kelgan shifokorlar uni Respublika ixtisoslashtirilgan shoshilinch tibbiy yordam ilmiy-amaliy markaziga olib borgan.

Shifokorlarning dastlabki xulosasiga ko‘ra, qizchada miya chayqalishi aniqlangan va u mutaxassislar nazorati ostida.