Toshkentda Aviator Korzinka do‘konida yong‘in sodir bo‘ldi, barcha fuqarolar evakuatsiya qilindi

Toshkent, O‘zbekiston (UzDaily.uz) — Bugun, 31 yanvar kuni soat 15:47 da Toshkent shahar yong‘in-qutqaruv xizmatiga Yashnobod tumanidagi Parkent ko‘chasida joylashgan Aviator Korzinka do‘koni binosida yong‘in chiqqanligi haqida xabar kelib tushdi, deb maʼlum qildi O‘zbekiston FVV.

Qutqaruv bo‘linmalari hodisa joyiga soat 15:53 da yetib bordi.

Barcha fuqarolar evakuatsiya qilingan, hozirda yong‘inni o‘chirish ishlari olib borilmoqda. Vazirlik maʼlumotiga ko‘ra, vaziyat Toshkent shahar yong‘in-qutqaruv xizmati tomonidan to‘liq nazoratga olingan. Yong‘in oqibatida jabrlanganlar haqida maʼlumot kelib tushmagan.

Yong‘inni bartaraf etish ishlari O‘zbekiston Respublikasi favqulodda vaziyatlar vaziri, general-mayor Azizbek Ikramov rahbarligida olib borilmoqda.