Toshkentda “aqlli” avtobus bekatlari o‘rnatilmoqda

Toshkent, O‘zbekiston (UzDaily.uz) — Toshkentda kameralar va favqulodda yordam tugmalari bilan jihozlangan “aqlli” avtobus bekatlarini o‘rnatish boshlanadi. Bu haqda Yo‘l harakatini tashkil etish markazi (YHTEM) matbuot xizmati xabar qildi.

Har bir bekat ikki dona videokamera bilan jihozlanadi, ular markazlashgan kuzatuv tizimiga ulanadi, shuningdek favqulodda holatlar uchun “SOS” tugmasi o‘rnatiladi. Bundan tashqari, imkoniyati cheklangan fuqarolar uchun maxsus kutish joyi ham nazarda tutilgan.

Bekatlarda avtobuslar harakati jadvali ko‘rsatilgan elektron tablolar va tezkor xaridlar uchun vending apparatlari paydo bo‘ladi. Idora maʼlumotiga ko‘ra, bunday yangiliklar poytaxtda jamoat transporti xavfsizligi, qulayligi va texnologik darajasini oshiradi.

Avvalroq shahar hokimiyati bekatlardagi savdo nuqtalarini tugatish to‘g‘risida qaror qabul qilgan edi. Bu yo‘lovchilar uchun erkin hudud yaratish va shahar transport xizmati sifatini yaxshilashga qaratilgan.