Toshkentda 80 dan ortiq tadbirkorlar ishtirokida O'zbekiston-Serbiya biznes forumi bo'lib o'tdi

Toshkent, O‘zbekiston (UzDaily.uz) — 20-fevral kuni Toshkentda ISSV tomonidan tashkil etilgan O‘zbekiston–Serbiya biznes-forumi bo‘lib o‘tdi.

Tadbir ikki mamlakatning 80 dan ortiq tadbirkorlarini birlashtirib, savdo-iqtisodiy va investitsiyaviy hamkorlikni kengaytirish, yangi qo‘shma loyihalar bo‘yicha kelishishga imkon yaratdi.

Dastlab O‘zbekiston Respublikasi Bosh vazirining o‘rinbosari Jamshid Xodjayev hamda Serbiya Respublikasi Bosh vazirining o‘rinbosari - iqtisodiyot vaziri Adriana Mesarovich o‘rtasida uchrashuv bo‘lib o‘tdi.

Muzokaralar chog‘ida hamkorlik istiqbollari, o‘zaro savdo hajmini oshirish choralari, investitsiyaviy hamkorlikni faollashtirish, shartnoma-huquqiy bazani takomillashtirish hamda qo‘shma loyihalarni qo‘llab-quvvatlash masalalari muhokama qilindi.

Plenar sessiyada O‘zbekiston–Serbiya munosabatlarining strategik ahamiyati alohida ta’kidlanib, o‘zaro savdo hajmini bir necha barobarga oshirish zarurligi qayd etildi.

Savdo va logistika to‘siqlarini bartaraf etish, tadbirkorlar o‘rtasidagi hamkorlikni kuchaytirish, Biznes kengashini tashkil etish hamda Toshkent va Belgrad shaharlarida savdo uylarini ochish masalalari ko‘rib chiqildi.

Farmatsevtika, to‘qimachilik va kimyo sanoati, qishloq xo‘jaligi, qurilish, energetika hamda IT yo‘nalishlari ko‘rib chiqildi.

B2B va G2B formatidagi uchrashuvlar doirasida aniq tashabbuslar ishlab chiqilib, qo‘shma loyihalarni amalga oshirishga kelishildi.