Toshkent, O‘zbekiston (UzDaily.uz) — 2025-yil 24-fevral kuni Toshkent xalqaro aeroportining jo‘nab ketish zalida "Anjir” biznes zalining ochilish marosimi bo‘lib o‘tdi. Marosimda "Uzbekistan Airports" AJ va operator kompaniya vakillari, shuningdek, jurnalistlar hamda blogerlar ishtirok etishdi.

"Anjir" biznes zali Toshkent xalqaro aeroportining jo‘nab ketish terminali "steril" hududining ikkinchi qavatida joylashgan bo‘lib, 427 kvadrat metr maydonni egallaydi. Ikki qavatda bir vaqtning o‘zida 116 yo‘lovchini qabul qilish imkoniyati mavjud. Zal kecha-kunduz davomida ishlaydi va mehmonlarga o‘z parvozini kutayotganda qulay vaqt o‘tkazish imkoniyatini beradi. Bu yerda bepul Wi-Fi, alohida hojatxona va dush xonalari mavjud. Shuningdek, issiq va sovuq gazaklar, birinchi va ikkinchi taomlar, salatlar, yangi mevalar, shirinliklar, spirtli va alkogolsiz ichimliklardan iborat turli xil taomlar taklif etiladi. Bolalar bilan sayohat qilayotgan yo‘lovchilar uchun chaqaloqlarni yo‘rgaklash stollari va kichkintoylarni qulay ovqatlantirish uchun bolalar o‘rindiqlari ham mavjud.

"Rekonstruksiya doirasida Toshkent aeroporti yildan-yilga o‘zgarib bormoqda: yangi kafe va do‘konlar paydo bo‘lmoqda, terminal kengaytirilmoqda va vokzal oldi maydoni obodonlashtirilmoqda. Bugun biz yangi biznes zalini ochmoqdamiz. Ta’kidlash joizki, bu butunlay yangi obyekt. Yo‘lovchilar oqimi ham har yili ortib borayotgani sababli - 2024-yilda biz qariyb 9 million yo‘lovchiga xizmat ko‘rsatdik - biznes-zallarga ham ehtiyoj tug‘ilmoqda. Endi poytaxt aeroportida mavjud bo‘lgan CIP Lounge va “Anor” yuqori qulaylikka ega zallaridan tashqari, biz “Anjir” biznes zalining ochilishini e’lon qilishdan mamnunmiz," - dedi Toshkent xalqaro aeroporti direktori Jasur Po‘latov.

Anjir biznes zalini Haydar Aliyev nomidagi Boku xalqaro aeroporti va Ganja xalqaro aeroportida yo‘lovchilarga xizmat ko‘rsatish bo‘yicha 10 yildan ortiq tajribaga ega bo‘lgan Ozarbayjonning “VIP Services Group” kompaniyasi boshqaradi. "Uzbekistan Airports" AJ va "VIP Services Group" o‘rtasida elektron ochiq savdolar yakunlari bo‘yicha tegishli shartnoma imzolandi.

"Biz Ozarbayjondan tashqaridagi ilk biznes-zalimiz aynan birodar O‘zbekistonda ochilganidan faxrlanamiz. “Anjir” business zali global kengayish strategiyamizning muhim qismi hisoblanadi. Interyerda Sharqning samimiyati va mehmondo‘stligini zamonaviy sayohatchi uchun zarur bo‘lgan biznes-zal texnologiyalari va qulayligi bilan uyg‘unlashtirishga harakat qildik. Umid qilamizki, yangi “Anjir” business zali biz dunyoning boshqa aeroportlarida ochishni rejalashtirgan kelajakdagi zallar uchun namuna bo‘ladi," - dedi “VIP Services Group” kompaniyasi bosh direktori Sobir Shukurov.

Ikkinchi qavatda O‘zbekiston banklari tomonidan chiqarilgan Mastercard premium karta egalari uchun 45 o‘rinli Mastercard brend loungeji joylashgan. “Anjir” business zali 24/7 rejimida ishlaydi. “Turkish Airlines” va “Air Astana” aviakompaniyalarining birinchi va biznes-klass yo‘lovchilari, shuningdek, Priority Pass, LoungeKey, DragonPass, Every Lounge kartalari egalari va sodiqlik dasturlari ishtirokchilari uchun ushbu zaldan foydalanish imkoniyati yaratilgan.