Toshkent viloyatida bolalarga diniy taʼlimni noqonuniy tarzda o‘qitish faoliyatiga chek qo‘yildi

Toshkent, O‘zbekiston (UzDaily.uz) — Toshkent viloyatida huquqni muhofaza qiluvchi organlar xususiy uylarda bolalarga dinni o‘qitish bilan bog‘liq noqonuniy faoliyatni fosh etib, unga barham berdi.

Tegishli bilim va ruxsatnomalarga ega bo‘lmagan ikki nafar qarindosh yashirin “hujra”lar tashkil etib, u yerda bolalarni o‘qitish evaziga pul mablag‘lari olgan, ayrim hollarda esa voyaga yetmaganlarga nisbatan jismoniy zo‘ravonlik qo‘llagan.

Toshkent viloyati IIBB maʼlumotlariga ko‘ra, hududiy DXX boshqarmasi xodimlari bilan hamkorlikda o‘tkazilgan tezkor tadbir davomida Zangiota tumanining “Chinor” mahallasida yashovchi 44 yoshli fuqaro va uning 65 yoshli xolasi ikki nafar yashash xonadonini yashirin diniy taʼlim berish uchun moslashtirgani aniqlangan.

Uylardan birida 10 nafar, ikkinchisida esa 5 nafar bola bo‘lib, ularning yashashi va mashg‘ulot olib borishi uchun sharoit yaratilgan.

Har bir bola uchun ular oyiga bir million so‘mdan 300 AQSH dollarigacha mablag‘ olgan.

Aniqlangan qoidabuzarliklar munosabati bilan bolalarni tarbiyalash va o‘qitish bo‘yicha o‘z majburiyatlarini lozim darajada bajarmagan ota-onalarga nisbatan maʼmuriy choralar qo‘llanildi.

Noqonuniy “hujra” tashkil etgan shaxslarga nisbatan O‘zbekiston Respublikasi Jinoyat kodeksining 229-2-moddasi 2-qismi («Diniy taʼlimotlarni o‘qitish tartibini buzish») bo‘yicha jinoyat ishi qo‘zg‘atilib, hozirda tergov ishlari olib borilmoqda.