Toshkent, O‘zbekiston (UzDaily.uz) — Toshkent viloyati hokimligi Bo‘stonliq tumanidagi Chorvoq suv ombori qirg‘og‘ida “Sea Breeze Uzbekistan” dam olish majmuasini qurish bo‘yicha rasmiy bayonot berdi.

Maʼmuriyat Bo‘stonliq tumani O‘zbekistondagi eng salohiyatli turizm hududlaridan biri ekanligini alohida taʼkidladi. 2024-yilda tumanga 12-million nafardan ortiq sayyoh tashrif buyurgan bo‘lib, ularning qariyb 300 ming nafari xorijliklardir. "Bu ko‘rsatkich hududning bugungi kundagi qabul qilish imkoniyatidan 4 barobar yuqori. Sayyohlar oqimi o‘sib borayotgani, mavjud mehmonxona va dam olish maskanlari yetarli emasligi esa qator noqulayliklarga sabab bo‘lmoqda." — deya taʼkidladi maʼmuriyat.

Viloyat hokimligidan ma’lum qilishlaricha, o‘tgan yili Bo‘stonliqda turizm eksporti 325 million AQSH dollarini tashkil etgan. Joriy yilning iyul oyiga qadar Bo‘stonliqqa 230 ming xorijiy sayyoh tashrif buyurdi. Turizmni rivojlantirish orqali daromadlarni oshirish Toshkent viloyatining o‘sish nuqtalaridan biridir.

Shu munosabat bilan, “Sea Breeze” kurort majmuasi loyihasi doirasida Chorvoq suv ombori bo‘yida 577 gektar yer maydoni va unga tutash 3 ming gektarlik hududda keng qamrovli ishlar rejalashtirilgan. Dam olish maskanlari, cho‘milish havzalari, sport maydonchalari, savdo va servis markazlari shular jumlasidan. Shuningdek, xalqaro festivallar, konsertlar va anjumanlar o‘tkazishga xizmat qiluvchi maydonlar hamda ikki qirg‘oqni bog‘lovchi ko‘prik quriladi.

Loyiha amalga oshirilishi natijasida 10 mingdan ziyod ish o‘rni yaratilishi, turizm eksporti 500 million AQSH dollarga yetishi, chet ellik sayyohlar oqimi esa yiliga 5 million nafargacha ko‘payishi kutilmoqda.

Alohida ta’kidlash joiz-ki, hudud aholisiga ochiqlik va hisobdorlikni ta’minlash maqsadida viloyat hokimligi loyiha doirasida tegishli majburiyatlarni o‘z zimmasiga oladi.

Hokimlik loyihaning shaffofligini taʼminlashga tayyorligini maʼlum qildi. Loyiha amalga oshirilishining barcha bosqichlari ekologiya, qurilish, kadastr va sanitariya sohalari bo‘yicha viloyat tuzilmalari tomonidan tizimli nazoratga olinishi ta’minlanadi. Yer uchastkalarini ajratish, ijaraga berish va qayta rasmiylashtirish bo‘yicha barcha jarayonlar tasdiqlangan master-reja asosida, ekologik talablar inobatga olingan holda va ochiq monitoring sharoitida amalga oshirilishi nazorat qilinadi", - deyiladi xabarda.

Barcha er egalariga kompensatsiya kafolatlanadi. Shuningdek, maʼmuriyat qonunni buzishga, atrof-muhitga yoki jamoat manfaatlariga zarar yetkazishga uringanlarga nisbatan chora koʻrishi haqida ogohlantirdi.