Toshkent shahar hokimiyati Shavkat Umurzakov nomidan ochilayotgan feyk akkauntlar haqida ogohlantirdi

Toshkent, O‘zbekiston (UzDaily.uz) — Toshkent shahar hokimiyati ijtimoiy tarmoqlarda poytaxt hokimi Shavkat Umurzakovning ismi va suratidan foydalanib, fuqarolarga murojaat qilayotgan soxta akkauntlar aniqlanganini maʼlum qildi.

Hokimiyat matbuot xizmati bildirishicha, bunday akkauntlarning barchasi firibgarlikka taalluqli bo‘lib, ushbu profillar orqali yuborilayotgan shaxsiy murojaatlar, yozishmalar yoki so‘rovlar hokim yoki shahar maʼmuriyati xodimlariga hech qanday aloqasi yo‘q.

Rasmiy xabarda taʼkidlanishicha, Toshkent shahar hokimi va hokimiyat mansabdor shaxslari fuqarolarga shaxsiy xabarlar orqali murojaat qilmaydi. Har qanday rasmiy sahifa yoki aloqa kanallari haqidagi maʼlumotlar oldindan faqatgina hokimiyatning rasmiy axborot resurslari orqali eʼlon qilinadi.

Fuqarolar bunday akkauntlarga ishonmaslikka, ular bilan aloqaga kirishmaslikka va shaxsiy maʼlumotlarini uchinchi shaxslarga taqdim etmaslikka chaqirildi. Shubhali xabarlar haqida zudlik bilan tegishli huquqni muhofaza qiluvchi organlarga xabar berish tavsiya etildi.