Toshkent, O‘zbekiston (UzDaily.uz) — Toshkent metropoliteni transport infratuzilmasini faol yangilash doirasida stansiyalaridagi uskunalarni modernizatsiya qilishni davom ettirmoqda.

O‘tgan yili “Novza” va «Xalqlar do‘stligi» stansiyalarida eskalator tizimi to‘liq yangilandi, 2025 yil 31 mart kuni esa «Mustaqillik maydoni» stansiyasida yangi eskalator ishga tushirildi. Bu haqda O‘zbekiston Transport vazirligi xabar berdi.

“Paxtakor” va «Hamid Alimjon» stansiyalaridagi eskalatorlarni o‘rnatish ishlari yakunlanish bosqichida.

Metropolitenning imkoniyati cheklangan shaxslar uchun qulayligini oshirish maqsadida «Buyuk Ipak Yo‘li» stansiyasida maxsus elektron ko‘targichlar o‘rnatildi. Ushbu ko‘targichlar avval «Xalqlar do‘stligi» stansiyasida joriy etilgan. Yil oxirigacha yana 16 ta stansiyada shunday qurilmalar o‘rnatish rejalashtirilgan.

Bundan tashqari, «Buyuk Ipak Yo‘li» stansiyasida sanitariya xonalari ochildi. Ilgari bunday xonalar faqat “Chilonzor” stansiyasida mavjud edi.

Yaqin oylarda yana sakkizta stansiyada sanitariya xonalari foydalanishga topshirilishi kutilmoqda, shuningdek, «Amir Temur xiyoboni», “Paxtakor” va “Beruni” stansiyalarida ishlar yakunlanish bosqichida.