Toshkent IIB aholini AI-video orqali firibgarlikka qarshi ogohlantirdi

Toshkent, O‘zbekiston (UzDaily.uz) — Toshkent shahar Ichki ishlar boshqarmasi yangi turdagi firibgarlik holatlari paydo bo‘layotgani haqida aholini ogohlantirdi.

Ijtimoiy tarmoqlarda sunʼiy intellekt texnologiyalari yordamida yaratilgan soxta videomateriallar tarqalmoqda. Bu safar firibgarlar “O‘zbekiston-24” telekanali yangilik syujetini taqlid qiluvchi videorolikni eʼlon qilishdi va uni shahar IIB tomonidan tayyorlangan deb ko‘rsatishdi. Tashqi ko‘rinishidan video haqiqiyga o‘xshasa-da, u rasmiy manba emas.

Ichki ishlar boshqarmasi fuqarolardan tanish bo‘lmagan saytlardan olingan maʼlumotga ishonmaslik, shubhali havolalarga kirmaslik va shaxsiy maʼlumotlarni bermaslikni so‘ramoqda. Rasmiy xabarlar faqat boshqarmaning rasmiy sahifalarida eʼlon qilinadi.

Shuningdek, idora soxta «xalqaro kiberpolitsiya» sayti huquqni muhofaza qiluvchi organlar bilan bog‘liq emasligini maʼlum qildi. IIB eslatib o‘tmoqda: hech qachon shaxsiy maʼlumotlaringizni yoki SMS kodlaringizni tashqi resurslarda kiritmang.

So‘nggi oylarda firibgarlar manfaat ko‘zlab sunʼiy intellekt texnologiyalaridan foydalanish holatlari ko‘paymoqda.

Huquqni muhofaza qiluvchi organlar aholini diqqatli bo‘lishga, maʼlumot manbalarini tekshirishga va firibgarlar hilasiga uchramaslikka chaqiradi.