Toshkent hokimiyati “Toshkent” mehmonxonasi buzilishi haqidagi mish-mishlarni rad etdi

Toshkent, O‘zbekiston (UzDaily.uz) — Ijtimoiy tarmoqlarda ilgari “Toshkent” mehmonxonasi bo‘lgan, hozirda Lotte City Hotel Tashkent Palace nomi bilan tanilgan binoning yaqin orada buzilishi haqidagi mish-mishlar tarqaldi. Shuningdek, mehmonxonadagi barcha xodimlar go‘yo ishdan bo‘shatilgani haqida ham xabarlar paydo bo‘ldi.

Toshkent shahar hokimiyati vakili Gulnoza Qosimova o‘zining shaxsiy Telegram kanalida ushbu maʼlumotlarni asossiz deb atab, ular haqiqatga to‘g‘ri kelmasligini taʼkidladi. Maʼlumot manbalari sifatida shahar Turizm va madaniy meros bosh boshqarmasi hamda mehmonxona maʼmuriyati ko‘rsatildi. Shuningdek, Facebook tarmog‘ida ham hokimiyat «Ilgari “Toshkent” mehmonxonasi bo‘lgan bino buzilishga tushmaydi», deya maʼlum qildi.

“Toshkent” mehmonxonasi yuqori martabali mehmonlar va delegatsiyalarni qabul qilish uchun meʼmorlar Mitxat Bulatov va Leonid Karash loyihasi asosida qurilgan.

U poytaxtda suzish havzasiga ega bo‘lgan ilk mehmonxona sifatida tarixga kirgan. Mehmonxona 1958 yil oktyabr oyida Osiyo va Afrika mamlakatlari yozuvchilari xalqaro konferensiyasi kunlarida ochilgan bo‘lib, unda qatnashganlar uning birinchi mehmonlari bo‘lgan.

2003 yilda mehmonxona boshqaruvi fransuz Air France kompaniyasining xalqaro Le Meridien brendiga o‘tgan. 2013 yilda rekonstruksiya ishlaridan so‘ng boshqaruv yaponiya-janubiy koreya brendi ostidagi Lotte tarmog‘iga topshirilgan.