Toshkent, O‘zbekiston (UzDaily.uz) — O‘zbekiston terma jamoasi bosh murabbiyi Temur Kapadze milliy jamoa rahbarligiga portugaliyalik mutaxassis Paulu Bentuni tayinlanishi mumkinligi haqidagi maʼlumotlarga izoh berdi.

Uning taʼkidlashicha, bosh murabbiy lavozimini kim egallashiga qaramay u uchun ham, butun jamoa uchun ham asosiy ustuvor vazifa — terma jamoani qo‘llab-quvvatlash bo‘lib qoladi.

«Hozir biz Do‘stlikdagi yangi bazada mashg‘ulotlar o‘tkazyapmiz. Bentuning Toshkentga kelganini ko‘rdik, ammo qandaydir kelishuvga erishilgani haqida bizga maʼlum emas. Agar u jamoani boshqarsa — unga omad tilayman. Biz har doim terma jamoamizni qo‘llab-quvvatlaymiz va bu murabbiyning familiyasiga bog‘liq emas. Har birimiz o‘z jamoamizning muxlisi bo‘lishimiz shart», — dedi Kapadze.

U muxlislarga ko‘rsatayotgan yordami uchun minnatdorchilik bildirdi va rahbariyat jahon chempionati tajribasiga ega mutaxassis bilan hamkorlik qilishga intilyayotganini qo‘shimcha qildi. Bu milliy jamoa rivojiga xizmat qilishi mumkinligini taʼkidladi.

Kapadze, shuningdek, O‘zbekiston terma jamoasining 2026 yilgi jahon chempionatida ishtirok etishi mamlakat tarixida ilk bor sodir bo‘lishini esga soldi. Shuning uchun futbolchilarni qo‘llab-quvvatlash va ular uchun ijobiy kayfiyat yaratish ayni paytda juda muhimligini qayd etdi.

«Xayr, Xudoga shukur, qisqa vaqt bo‘lsa-da, milliy jamoani boshqarish sharafiga ega bo‘ldim. 34 yillik orzusimiz ro‘yobga chiqdi va biz barchamiz bundan xursandmiz», — deya so‘zini yakunladi u.