TBI va Strategik islohotlar agentligi farmatsevtika sanoatining uzoq muddatli rivojlanish strategiyasini ishlab chiqishda yordam beradi

Toshkent, O‘zbekiston (UzDaily.uz) — Farmatsevtika tarmog‘ini rivojlantirish agentligi direktori Abdulla Azizov hamda Toni Bler Global o‘zgarishlar instituti (TBI) mutaxassislari va Strategik islohotlar agentligi vakillari bilan video-konferens aloqa vositasi orqali bir qator muloqotlar tashkil etildi.

Uchrashuvlarda farmatsevtika tarmog‘ini uzoq muddatli istiqbollarda rivojlantirish strategiyasi doirasida amalga oshirilishi ko‘zda tutilgan chora-tadbirlar, ustuvor yo‘nalishlar hamda aniq vazifalar muhokama qilindi.

Muloqotlar davomida O‘zbekistonda oziq-ovqat va farmatsevtika idorasini (UzFDA) bosqichma-bosqich tashkil etish tashabbusi ilgari surilib, mazkur tuzilmani shakllantirish uchun zarur tashkiliy-huquqiy asoslarni yaratish masalalariga alohida eʼtibor qaratildi.

Shu bilan birga, sohada qabul qilingan qonunchilik va normativ-huquqiy hujjatlarni xatlovdan o‘tkazish hamda ularni tizimlashtirish vazifalari yuzasidan ham fikr almashildi.