Tadbirkorlarga mol va qo‘y go‘shtini import qilishda subsidiya ajratiladi

Toshkent, O‘zbekiston (UzDaily.uz) — “Aholini asosiy turdagi oziq-ovqat mahsulotlari bilan taʼminlashni qo‘llab-quvvatlashning qo‘shimcha chora-tadbirlari to‘g‘risida”gi Prezident qarori qabul qilindi.

Qarorga ko‘ra, go‘sht mahsulotlari narxlari barqarorligini taʼminlashga qaratilgan quyidagi yo‘nalishlarda O‘zbekiston Respublikasi respublika byudjetidan vaqtinchalik subsidiyalar ajratilishi belgilandi:

2026 yil 1 apreldan 2026 yil 1 avgustga qadar tadbirkorlarga mol va qo‘y go‘shtini import qilishda, ularni havo transportida tashish xarajatlarining 50 foizi, biroq har bir kilogramm go‘sht uchun 0,8 AQSH dollaridan oshmagan miqdorda;

2026 yil 1 apreldan 2026 yil 31 dekabrga qadar xorijiy davlatlardan havo transporti orqali import qilingan nasldor qoramol qiymatining 10 foizi, biroq har bir bosh qoramol uchun 4 mln so‘mdan oshmagan miqdorda.

Mazkur qarorga muvofiq subsidiyalar Agrar sohada to‘lovlar agentligi tomonidan moliyalashtiriladi.