So‘nggi besh yil ichida O‘zbekistonda xorijiy investitsiyali korxonalar soni 1,8 barobarga oshdi

Toshkent, O‘zbekiston (UzDaily.uz) — So‘nggi besh yil mobaynida O‘zbekistonda xorijiy investitsiyalar ishtirokidagi korxonalar soni 1,8 barobarga ko‘paydi.

Milliy statistika qo‘mitasi maʼlumotlariga ko‘ra, 2025 yil 1 oktyabr holatiga ko‘ra mamlakatda 17 188 ta xorijiy investitsiya ishtirokidagi korxona faoliyat yuritmoqda. Shulardan 4 134 tasi qo‘shma, 13 054 tasi esa to‘liq xorijiy korxonalardir.

Eng ko‘p korxonalar Xitoy (4 570 ta), Rossiya (3 150 ta) va Turkiya (2 048 ta) investorlari ishtirokida tashkil etilgan.

Shuningdek, o‘ntalikka Qozog‘iston (1 165 ta), Koreya Respublikasi (681 ta), Afg‘oniston (616 ta), Birlashgan Arab Amirliklari (377 ta), Tojikiston (364 ta), Hindiston (343 ta) va Qirg‘iz Respublikasi (339 ta) ham kirdi.

Xorijiy korxonalar sonining o‘sishi O‘zbekistonda investitsiya faolligining kuchayganini va xorijiy biznesning milliy iqtisodiyotga bo‘lgan qiziqishi ortib borayotganini aks ettiradi.