Soliq qo‘mitasi qurilish materiallari MXIK umumiy kodlarini cheklaydi

Toshkent, O‘zbekiston (UzDaily.uz) — O‘zbekiston Soliq qo‘mitasi qurilish materiallari uchun mahsulot va xizmatlarning umumiy identifikatsiya kodlari (MXIK)dan elektron hisob-fakturalarni rasmiylashtirishda foydalanishni bosqichma-bosqich cheklash haqida maʼlum qildi.

Tegishli ishlar Qurilish va uy-joy kommunal xo‘jaligi vazirligi bilan hamkorlikda olib borilmoqda.

Qo‘shma tahlil davomida ikki idora mutaxassislari Yagona elektron milliy mahsulotlar katalogi hamda «Qurilish materiallari milliy klassifikatori» platformasida taqdim etilgan qurilish materiallarining umumiy MXIK kodlarini o‘rgandi.

Birinchi bosqich yakunlariga ko‘ra, amaldagi kodlar orasidan umumlashtirilgan nomlarga ega 200 ta pozitsiya aniqlandi. Ularni elektron hisob-fakturalarda qo‘llash joriy yil 1 iyuldan boshlab cheklanadi.

Idora xo‘jalik yurituvchi subyektlarga oldindan foydalanilayotgan umumiy kodlarni eʼlon qilingan ro‘yxatga muvofiq detallashtirilgan MXIKlarga almashtirishni tavsiya qildi. Umumiy kodlarni inventarizatsiya qilish ishlari davom etmoqda: uning yakunlari bo‘yicha 2026 yil 2 aprel kuni ro‘yxat yana 200 dan ortiq yangi pozitsiya bilan kengaytiriladi.

O‘z mahsuloti uchun aniq MXIKni belgilash yoki yangi kod yaratish zarurati bo‘lgan tadbirkorlar mkinfo.uz platformasidagi shaxsiy kabinet orqali elektron raqamli imzo yordamida murojaat yuborishlari mumkin.

Shuningdek, detallashtirilgan kodlarga o‘tish bilan bog‘liq masalalar bo‘yicha Qurilish va uy-joy kommunal xo‘jaligi vazirligi huzurida ishchi guruh faoliyat yuritmoqda.