Sirdaryo viloyati delegatsiyasi Tyanszinda ishchi tashrifni boshladi

Toshkent, O‘zbekiston (UzDaily.uz) — Sirdaryo viloyati delegatsiyasi Sirdaryo viloyati hokim Erkinjon Turdimov rahbarligida Tyanszin shahriga ishchi tashrif bilan bordi.

Tashrifning birinchi kuni amaliy uchrashuvlar va zamonaviy texnologiyalar bilan tanishuvga bag‘ishlandi. Viloyat rahbariyati Xitoy–SHHT yashil sanoat sohasidagi hamkorlik markazi, raqamli iqtisodiyot platformasi, Phytium Information Technology kompaniyasi, tibbiy asbob-uskunalar savdo platformasining xalqaro markazi hamda bir qator yirik korxona va tashkilotlarga tashrif buyurdi.

Tashrif davomida raqamli iqtisodiyot va maʼlumotlarni boshqarish, yuqori texnologiyali sanoat zonalari, axborot texnologiyalari va kiberxavfsizlik, innovatsion ishlab chiqarish, elektron xaridlar hamda tibbiy infratuzilma yo‘nalishlarida muzokaralar o‘tkazildi. Shuningdek, 360 Technology Group va Tianjin Haitai Internet Technology kompaniyalari vakillari bilan uchrashuvlar bo‘lib o‘tdi.

Taʼkidlanishicha, ushbu tashrif faqat tanishuv emas, balki aniq hamkorlikni yo‘lga qo‘yishga qaratilgan. Sirdaryo viloyati uchun investitsiyalarni jalb qilish, zamonaviy boshqaruv yechimlarini joriy etish va yangi texnologiyalarni o‘zlashtirish bo‘yicha amaliy qadamlar boshlab yuborilgan.