Sirdaryo delegatsiyasi Bangkokdagi ASOCIO AI Summit 2026 sammitida ishtirok etdi

Toshkent, O‘zbekiston (UzDaily.uz) — Sirdaryo viloyati delegatsiyasi Tailandning Bangkok shahrida bo‘lib, qator samarali uchrashuvlar va muzokaralar o‘tkazdi.

Tashrifning ilk kunida delegatsiya aʼzolari Osiyo va Okeaniya mintaqasidagi IT va raqamli texnologiyalar sohasidagi nufuzli xalqaro tadbir — ASOCIO AI Summit 2026 sammitida ishtirok etdi. Unda dunyoning 24 ta mamlakatidan vakillar qatnashib, hamkorlik va investitsiya imkoniyatlari muhokama qilindi.

Sammit davomida Sirdaryo viloyatining raqamlashtirish salohiyati, investitsion imkoniyatlari hamda IT sohasini rivojlantirishga qaratilgan tashabbuslar taqdim etildi.

Sammit yakunida Sirdaryo viloyati hokimligi rasman ASOCIO tashkilotiga aʼzolikka qabul qilindi.

Shuningdek, tadbir doirasida qator yetakchi xalqaro IT assotsiatsiyalari bilan amaliy kelishuvlarga erishildi. Ular orasida Pokistonning P@SHA, Filippinning IBPAP, Bangladeshning J.A.N. Associates Ltd, Yaponiyaning JISA va Indoneziyaning FTII tashkilotlari bor.

Mazkur kelishuvlar startap loyihalarni qo‘llab-quvvatlash, qo‘shma tashabbuslarni amalga oshirish va xalqaro hamkorlikni kengaytirishga xizmat qiladi.

Ushbu hamkorlik natijasida viloyatda BPO xizmatlarini rivojlantirish, IT-eksportni oshirish hamda ilg‘or xorijiy tajribani jalb etish uchun yangi imkoniyatlar yaratiladi.