Sindarov Yesipenko bilan durangdan keyin yetakchi bo‘ldi

Toshkent, O‘zbekiston (UzDaily.uz) — O‘zbekistonlik grossmeyster Javohir Sindarov rossiyalik shaxmatchi Andrey Yesipenko bilan Nomzodlar musobaqasining sakkizinchi turida durang o‘ynadi. Ushbu uchrashuv 7 aprel kuni Kiprda bo‘lib o‘tdi.

Sindarov qora donada o‘ynagan partiya 24-yurishdan so‘ng yakunlandi. Raqiblar teng pozitsiyada durangga rozi bo‘lishdi.

Sakkiz turdan so‘ng o‘zbekistonlik shaxmatchi 6,5 ochko jamg‘ardi, beshta g‘alaba qozonib, uch marta durang o‘ynadi va turnir jadvalida yakka yetakchilikni saqlab qolmoqda. Uning eng yaqin taʼqibchisi Fabiano Karuana ustidan ustunligi ikki ochkoga yetdi. Amerika grossmeysteri Xikaru Nakamuraga qora donada o‘ynab mag‘lub bo‘ldi.

Turning boshqa partiyalarida Rameshbabu Pragnanandxa Anish Giriga yutqazdi, Mattias Blyubaum va Vey I esa durang o‘ynashdi.

To‘qqizinchi turda, 8 aprel kuni Sindarov qora donada Blyubaumga qarshi o‘ynaydi. Ushbu paytga kelib, Blyubaum oltita partiyani durang bilan yakunlab, bir marta mag‘lub bo‘lgan.

Birinchi davra yakunlariga ko‘ra, o‘zbekistonlik shaxmatchi 7 imkondan 6 ochko jamg‘ardi va bu Nomzodlar musobaqasi zamonaviy tarixidagi eng yaxshi start bo‘ldi.

Turnir 29 martdan 15 aprelgacha Kiprda dunyoning sakkiz nafar eng kuchli grossmeysterlari ishtirokida o‘tkazilmoqda. Musobaqa ikki davradan iborat bo‘lib, jami 14 turni o‘z ichiga oladi. G‘olib amaldagi jahon chempioni Dommaradju Gukeshga qarshi jahon shaxmat toji uchun match o‘tkazish huquqini qo‘lga kiritadi. Turnirning mukofot jamg‘armasi 700 ming yevrodan iborat.