Toshkent, O‘zbekiston (UzDaily.uz) — Shanxay hamkorlik tashkiloti (SHHT)ga aʼzo davlatlar ochiq, shaffof, adolatli va noxolis bo‘lmagan ko‘p tomonlama savdo tizimi tamoyillariga sodiqligini tasdiqlovchi qo‘shma bayonot bilan chiqishdi.

Hujjatda Jahon savdo tashkiloti (JST)ning global savdo tartibining asosi sifatidagi muhim o‘rni taʼkidlangan.

Tashkilot aʼzolari ochiq jahon iqtisodiyotini rivojlantirishga ko‘maklashish, shuningdek, global muammolarga samarali javob berish uchun ko‘p tomonlama savdo tizimining salohiyatini saqlash va mustahkamlash niyatida ekanliklarini bildirishdi.

«SHHTga aʼzo davlatlar ko‘p tomonlama savdo tizimining imkoniyatlarini saqlash va mustahkamlashga qatʼiy bel bog‘lagan», — deyiladi bayonotda.

Bayonotda JST doirasida barqaror rivojlanish masalalarini muhokama qilish muhimligiga alohida eʼtibor qaratildi. Shuningdek, jahon savdosi barqarorligi va ishonchliligini taʼminlaydigan ochiq va ishonchli global yetkazib berish zanjirlarini saqlash zarurligi taʼkidlangan.

Bu bayonot SHHTning xalqaro savdo sohasidagi hamkorlikni mustahkamlashga qaratilgan saʼy-harakatlarini yana bir bor tasdiqlab, aʼzo davlatlarning adolatli va muvozanatli jahon iqtisodiy tartibini yaratishga intilishini aks ettiradi.