Shanxayda bo'lib o'tgan forumda O'zbekiston Xitoy bilan savdo aloqalarini rivojlantirmoqda

Toshkent, O‘zbekiston (UzDaily.uz) — Xitoy Xalq Respublikasining Shanxay shahrida bo‘lib o‘tayotgan 8-Xitoy xalqaro import yarmarkasi (CIIE) doirasida “Markaziy Osiyo – Xitoy” formatida To‘siqlarsiz savdo forumi o‘tkazildi.

O‘zbekiston Respublikasi investitsiyalar vaziri o‘rinbosari Ilzat Kasimov o‘z nutqida mamlakatdagi qulay investitsiya muhiti, ishlab chiqarish imkoniyatlari va Markaziy Osiyo hamda Xitoy o‘rtasidagi savdo koridorlarini rivojlantirishning strategik ahamiyatini ta’kidladi. Shuningdek, tovarlar, xizmatlar va investitsiyalar almashinuvini tezlashtirish hamda to‘siqlarni olib tashlash masalalariga alohida e’tibor qaratildi.

Tadbirda Tsyansu provinsiyasi gubernatori Lyu Syaotao, Qozog‘iston Respublikasining savdo va integratsiya vaziri Arman Shakkaliev, Xitoy Savdo vazirining o‘rinbosari Lin Ji, shuningdek, mintaqa mamlakatlarining davlat organlari va biznes doiralari vakillari ishtirok etdi.

Tsyansu provinsiyasi Xitoydagi ikkinchi yirik iqtisodiy markazi hisoblanadi, 2024-yilda uning YAIM hajmi 1,9 trillion AQSh dollaridan oshdi. Asosan mashinasozlik, elektronika, kimyo, kemasozlik va qayta tiklanuvchi energetika tarmoqlari rivojlangan.

Tadbir ishtirokchilari mintaqaviy integratsiyani chuqurlashtirish, moliyaviy, logistika va infratuzilma aloqalarini mustahkamlashning ahamiyatini qayd etib, Markaziy Osiyo davlatlari va Xitoy o‘rtasida barqaror hamkorlikni rivojlantirishga tayyorliklarini bildirdilar.