Toshkent, O‘zbekiston (UzDaily.uz) — 2025-yil 1-aprel kuni Oliy Majlis Senati Raisi Tanzila Narbayeva Rossiya Federatsiyasining O‘zbekiston Respublikasidagi Favqulodda va Muxtor Elchisi Oleg Malginov bilan uchrashdi.

Uchrashuvda O‘zbekiston va Rossiya o‘rtasidagi ko‘p qirrali strategik munosabatlarni rivojlantirish istiqbollari, shuningdek, ikki tomonlama hamkorlikni mustahkamlashda muhim o‘rin tutadigan parlamentlararo aloqalarni faollashtirish masalalari ko‘rib chiqildi.

Shuningdek, O‘zbekistonda o‘tkaziladigan Parlamentlararo ittifoqning 150-yubiley assambleyasiga tayyorgarlik doirasida ikki mamlakat parlamentlari o‘rtasidagi hamkorlikni chuqurlashtirish va kengaytirish masalalari muhokama qilindi.

Oleg Malginov Parlamentlararo ittifoqning yubiley assambleyasida Rossiya delegatsiyasining ishtirok etishini qayd etib, bu O‘zbekiston va Rossiya o‘rtasidagi strategik hamkorlik mustahkamlanayotganidan dalolat berib turishini alohida taʼkidladi.

Uchrashuv yakunida ikki mamlakat xalqlari manfaatlari yo‘lida konstruktiv va o‘zaro manfaatli hamkorlikni davom ettirishga kelishib olindi.