Senat “O‘zbekiston Respublikasining Uy-joy kodeksini tasdiqlash to‘g‘risida”gi Qonunni rad etdi

Toshkent, O‘zbekiston (UzDaily.uz) — Senatorlar yalpi majlisda “O‘zbekiston Respublikasining Uy-joy kodeksini tasdiqlash to‘g‘risida”gi Qonunini ko‘rib chiqdi.

Qayd etilganidek, uy-joy munosabatlarini huquqiy tartibga solishning yaxlit tizimi mavjud emasligi uy-joy siyosatini izchil amalga oshirishni murakkablashtirib, o‘z navbatida, sohadagi davlat boshqaruvini qayta ko‘rib chiqishni hamda tartibga solishning samarali mexanizmlarini joriy etishni talab qilmoqda. Bundan tashqari, Uy-joy kodeksi va Fuqarolik kodeksida nazarda tutilgan va bir-birini takrorlaydigan ayrim normalar o‘zaro zid bo‘lib, huquqni qo‘llash jarayonida turli nizoli holatlarni keltirib chiqarmoqda.

Ushbu muammolarni bartaraf etish maqsadida “O‘zbekiston Respublikasining Uy-joy kodeksini tasdiqlash to‘g‘risida”gi Qonun ishlab chiqilgan.

Senatorlar tomonidan olib borilgan o‘rganish va tahlillar Qonunda qayta ko‘rib chiqilishi lozim bo‘lgan masalalar mavjudligini ko‘rsatdi.

Xususan, Kodeksning 7-moddasida Qurilish va uy-joy kommunal xo‘jaligi vazirligining ko‘p kvartirali uylardan texnik jihatdan foydalanish normalari hamda qoidalariga rioya etish ustidan nazoratni amalga oshirishi belgilangan.

“Ko‘p kvartirali uylarni boshqarish to‘g‘risida”gi Qonunda esa ushbu vakolatlar Uy-joy kommunal xizmat ko‘rsatish vazirligi huzuridagi Ko‘p kvartirali uy-joy fondidan foydalanish sohasini nazorat qilish inspeksiyasiga berilgan.

O‘zbekiston Respublikasi Prezidentining 2023-yil 28-avgustdagi PF-151-sonli Farmoniga asosan Ko‘p xonadonli uy-joy fondidan foydalanishni nazorat qilish inspeksiyasi, Ichimlik suvidan foydalanishni nazorat qilish inspeksiyasi va Qurilish sohasida nazorat inspeksiyasi negizida Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi tashkil etilgan.

Yuqoridagilarni inobatga olib, Kodeksning 7-moddasida belgilangan Qurilish va uy-joy kommunal xo‘jaligi vazirligi vakolatlarini qayta ko‘rib chiqish maqsadga muvofiq ekanligi qayd etildi.

Kodeksning 30-moddasida turar joyni mulkdorlar bilan tuziladigan shartnoma asosida buzish va o‘rnida yangi bino qurish tartibi belgilangan bo‘lsa, 36-moddasida ham turar joylarni buzish va ularning o‘rnida yangi turar joylar qurish nazarda tutilgan.

Bir munosabat Kodeksning 2 ta moddasida takror bayon qilinayotganligi sababli 30 va 36-moddalarini muvofiqlashtirish lozimligi taʼkidlandi.

Bundan tashqari, Kodeksning 40-moddasida uy-joy sharoitlarini yaxshilashga muhtoj 5 toifa shaxslar ko‘rsatilgan.

Ushbu toifalarni belgilashda asos sifatida olingan Vazirlar Mahkamasining 2019-yil 26-fevraldagi 170-sonli qarori bilan tasdiqlangan Uy-joy sharoitlarini yaxshilashga muhtoj bo‘lgan fuqarolarni hisobga olish, davlat uy-joy fondidagi turar joylarni taqsimlash va taqdim etish tartibi to‘g‘risidagi nizom bekor qilingan.

Uning o‘rniga Vazirlar Mahkamasining 2024-yil 11-martdagi 124-sonli qarori bilan Davlat uy-joy fondidan foydalanish va uni tasarruf etish tartibi to‘g‘risidagi nizom tasdiqlangan.

Ushbu Nizomda 5 ta toifadan tashqari uy-joy ajratilayotgan aholi punktida kamida uch yil yashayotgan va ro‘yxatda turgan fuqarolar ham uy-joy sharoitlarini yaxshilashga muhtoj bo‘lgan fuqarolar hisoblanishi belgilangan.

Bu o‘rinda uy-joy sharoitlarini yaxshilashga muhtoj bo‘lgan fuqarolar toifasini qayta ko‘rib chiqish lozim bo‘ladi.

Senatorlar ushbu Qonunda yana boshqa bir-biriga zid normalar hamda amalga oshirilgan maʼmuriy islohotlar doirasida qayta tashkil etilgan inspeksiyalar masalalariga alohida eʼtibor qaratdi.

Yuqoridagilarni inobatga olib, senatorlar Qonunni rad etdi.