Samarqanddagi Aviator savdo markazida yuz bergan fojiadan so‘ng ikki savdo markazida bolalar zonalari va fudkortlar yopildi

Toshkent, O‘zbekiston (UzDaily.uz) — Samarqand shahridagi Aviator savdo markazida sodir bo‘lgan fojiadan keyin ikki yirik savdo markazida bolalar uchun mo‘ljallangan zonalar va fudkortlar vaqtincha yopildi.

Rejali tekshiruvlar davomida Favqulodda vaziyatlar boshqarmasi xodimlari Makon Mall savdo markazida yong‘in xavfsizligi talablari buzilganini aniqladi.

Natijada aniqlangan kamchiliklar to‘liq bartaraf etilgunga qadar bolalar maydonchasi, fudkort va qator do‘konlar joylashgan uchinchi va to‘rtinchi qavatlar yopildi.

Shunga o‘xshash qoidabuzarliklar Family Park savdo markazida ham aniqlanib, u yerdagi Penta Zone bolalar o‘yin maydoni faoliyati vaqtincha to‘xtatildi.

Samarqand viloyati FVB vakili Ilhom Boqiyevning maʼlum qilishicha, savdo markazlarida tekshiruvlar davom ettirilmoqda va yaqin vaqt ichida ular viloyatdagi boshqa obyektlarni ham qamrab olishi mumkin.

Reydlar biznes-ombudsman ruxsati bilan va tadbirkorlarni oldindan xabardor qilgan holda o‘tkazilmoqda.