Saida Mirziyoyeva Yuta shtatidan kelgan delegatsiya bilan uchrashdi

Toshkent, O‘zbekiston (UzDaily.uz) — Oʻzbekiston Prezidenti maʼmuriyati rahbari Saida Mirziyoyeva Devid Bednar boshchiligidagi Yuta shtati (AQSh) biznes delegatsiyasi bilan mazmunli uchrashuv oʻtkazdi. Uchrashuv davomida tomonlar Oʻzbekiston-Amerika munosabatlari rivojlanishida yangi bosqich boshlanganini mamnuniyat bilan qayd etdilar.

Prezident Shavkat Mirziyoyevning AQSh fuqarolari uchun vizasiz rejimni joriy etish toʻgʻrisidagi qarori ikki mamlakat oʻrtasidagi biznes va gumanitar aloqalarni kengaytirish yoʻlidagi muhim qadam boʻlishi alohida taʼkidlandi.

Prezident Farmoniga muvofiq, AQSh-Oʻzbekiston Biznes va Investitsiya Kengashi tashkil etilmoqda. Uning faoliyatini muvofiqlashtirish uchun Oʻzbekistonning AQShdagi elchixonasida vazir-maslahatchi lavozimi tashkil etilmoqda.

Shuningdek, ushbu farmon asosida O‘zbekiston rezidentlari O‘zbekiston banklaridagi hisobvaraqlaridan mablag‘larni AQSHda korxonalar tashkil etish, ularning kapitalida ishtirok etish yoki filiallarini mablag‘ bilan to‘ldirish uchun erkin o‘tkazishlari mumkin bo‘ladi.

Ushbu qadam oʻzbek tadbirkorlarining tashqi iqtisodiy faoliyatini yanada rivojlantirish, Qoʻshma Shtatlar bilan investitsiya hamkorligini mustahkamlash va Oʻzbekistonning ochiq va zamonaviy iqtisodiyot sifatidagi yangi qiyofasini shakllantirishga qaratilgan.