Saida Mirziyoyeva Nukusda HealthTech AI Hackathon g‘oliblarini taqdirlash marosimida ishtirok etdi

Toshkent, O‘zbekiston (UzDaily.uz) — Nukusda tibbiyot sohasida innovatsion IT-ilovalar taqdim etilgan HealthTech AI Hackathon tanlovi g‘oliblarini taqdirlash marosimi bo‘lib o‘tdi.

Marosimda O‘zbekiston Respublikasi Prezidenti Administratsiyasi rahbari Saida Mirziyoyeva ishtirok etib, ushbu tashabbus sog‘liqni saqlashda mahalliy raqamli yechimlarni rivojlantirishdagi muhimligini ta’kidladi.

"Men ushbu tadbirda aql-zakovatli, intiluvchan, g‘oyalarga boy va yuragi ilhomga to‘la yigit-qizlarni uchratganimdan juda xursand bo‘ldim. 44 ta jamoa, 300 dan ortiq ishtirokchi, yuzlab yangi tashabbus. Yosh shifokorlar va texnologiya sohasi mutaxassislari kelajak tibbiyoti uchun yechimlar izlab, bir maqsad yo‘lida birlashmoqda", - dedi Saida Mirziyoyeva.

Uning so‘zlariga ko‘ra, raqamli vositalar orqali inson hayotini saqlab qolish, tashxisni yanada aniq va davolashni yanada qulay qilish haqida o‘ylamoqda.

"Aslida ularning har birining o‘ziga xos hayotiy hikoyasi, shu davraga qo‘shilishiga turtki bo‘lgan shaxsiy sabablari bor. Ko‘pchilik “Hackathon”ga mukofot uchun emas, balki yaqinlarining og‘rig‘ini his etgani va ularning hayotini o‘zgartiruvchi chora topishni istagani uchun kelgan. Shu bois ham ularning ko‘zlari yonib turibdi, amaliy natijalarning samarali va manfaatli bo‘lgani ham shundan", - deydi u.

Saida Mirziyoyeva mavjud loyihalarni rivojlantirishni qo‘llab-quvvatlash, ularni takomillashtirishga ko‘maklashish, investorlar topish muhimligini ta’kidladi.

“Ishtirokchilar orasida o‘z g‘oyalarini dadil himoya qilayotgan, noyob mahsulotlar yaratayotgan va murakkab texnologiyalarni ishonch bilan o‘zlashtirayotgan qizlar ko‘pligidan mamnunman”, — deya qo‘shimcha qildi u.

HealthTech AI Hackathon tanlovi mamlakatning barcha hududlarini qamrab oladigan yirik Nationwide AI Hackathon loyihasining bir qismidir. 2026 yil oxirigacha minglab yosh mutaxassislar ishtirok etadi.

“Ishonchim komilki, ular orasida yurtimizni yuksak marralarga olib chiqadigan bo‘lajak novatorlar, olimlar va yetakchilar bor”, — deb ta’kidladi Prezident Administratsiyasi rahbari o‘zining Telegram-kanalida.

Loyihaning navbatdagi bosqichi Samarqand shahrida bo‘lib o‘tadi.