Toshkent, O‘zbekiston (UzDaily.uz) — Rossiya tomoni taklifiga binoan O‘zbekiston Respublikasi Prezidentining yordamchisi Saida Mirziyoyeva Moskvada Rossiya Federatsiyasi Prezidenti Maʼmuriyati rahbari Anton Vayno bilan uchrashuv o‘tkazdi. Tomonlar O‘zbekiston-Rossiya strategik sherikligining hozirgi holati va istiqbollarini atroflicha muhokama qilishdi. Ushbu hamkorlik jadal rivojlanmoqda va sezilarli natijalar bermoqda.

Muloqot davomida erishilgan kelishuvlarni muvofiqlashtirish va amalga oshirish masalalariga alohida eʼtibor qaratildi. Prezidentlar darajasida belgilangan ustuvor vazifalarni samarali hal qilish uchun monitoring mexanizmini shakllantirish muhimligi taʼkidlandi.

Savdo-iqtisodiy va investitsiyaviy sohalardagi hamkorlik, innovatsion loyihalarni yo‘lga qo‘yish, hududlararo aloqalarni kengaytirish masalalari ham muhokama qilindi.

Gumanitar yo‘nalishdagi hamkorlik va mehnat migratsiyasi bo‘yicha fikr almashildi. Barcha yo‘nalishlarda yaqin hamkorlik va muvofiqlashuv zarurligi qayd etildi.

Shu kuni Saida Mirziyoyeva Rossiya Federatsiyasi Prezidenti Maʼmuriyati rahbarining birinchi o‘rinbosari Sergey Kiriyenko bilan ham uchrashuv o‘tkazdi. Suhbat davomida o‘zaro ishonchga asoslangan munosabatlar ikki davlat rahbarlari o‘rtasidagi mustahkam ittifoq va ko‘p qirrali hamkorlik poydevori ekani alohida taʼkidlandi.

Yoshlar va kadrlar siyosati masalalariga alohida eʼtibor qaratildi. Ikkala tomon ham iqtidorli yoshlarni qo‘llab-quvvatlash va yangi avlod malakali rahbarlarini tayyorlash bo‘yicha qo‘shma dasturlardan manfaatdor ekani aytildi.

Taʼlim sohasidagi ijobiy tendensiyalar qayd etildi: rossiyalik oliy o‘quv yurtlarida tahsil olayotgan o‘zbekistonlik talabalar soni ortib bormoqda, O‘zbekistonda esa yetakchi rus universitetlarining filiallari muvaffaqiyatli faoliyat yuritmoqda.

Shuningdek, Rossiya Prezidenti Maʼmuriyati rahbarining birinchi o‘rinbosari Aleksey Gromov bilan uchrashuv bo‘lib o‘tdi. Asosiy mavzulardan biri — axborot sohasidagi hamkorlik bo‘ldi. Global media makonining tez o‘zgarib borayotgan sharoitida xolis, barqaror va masʼul axborot muhitini shakllantirish muhimligi taʼkidlandi.

Axborot xavfsizligi, yolg‘on maʼlumotlarning tarqalishiga qarshi kurashish va jurnalistikaning kasbiy standartlarini targ‘ib qilish bo‘yicha hamkorlik masalalari muhokama qilindi. Bu yo‘nalishda Toshkentda amaliy maslahatlar o‘tkazishga tayyorlik bildirildi.

Mehnat migratsiyasini yoritish va madaniy diplomatiyani rivojlantirish masalalariga ham eʼtibor qaratildi. Axborot siyosatida masʼul va teran yondashuv zarurligi, gumanitar tashabbuslarni kengaytirish esa ikki xalq o‘rtasidagi ishonch va anglashuvni mustahkamlash vositasi sifatida qayd etildi.