Rossiya va Oʻzbekiston turizm uchun yangi ufqlarni rivojlantirmoqda

Toshkent, O‘zbekiston (UzDaily.uz) — 2026-yil 11-mart kuni Moskvadagi “Krokus Ekspo” xalqaro ko‘rgazmalar markazida “Rossiya – O‘zbekiston: turizm sohasidagi hamkorlikning yangi ufqlari” mavzusidagi strategik sessiya bo‘lib o‘tdi.

Tadbirda O‘zbekiston Respublikasi Turizm qo‘mitasi raisi o‘rinbosari S. Tadjiyev ishtirok etib, mamlakatning turizm sohasini transformatsiya qilish strategiyasi hamda ikki tomonlama hamkorlikning yangi shakllarini taqdim etdi.

S. Tadjiyev o‘z nutqida bugungi kunda O‘zbekiston an’anaviy madaniy-ma’rifiy turizm doirasidan chiqib, ko‘p tarmoqli turizm iqtisodiyotini shakllantirayotganini alohida ta’kidladi. Gastronomik, sarguzasht, tibbiy va wellness-turizmi, ekologik yo‘nalishlar hamda zamonaviy shahar turizmi jadal rivojlanayotgan sohalar qatorida ekanligi qayd etildi.

Shuningdek, Buyuk Ipak yo‘li bo‘ylab yagona sayyohlik koridorini yaratuvchi “Toshkent – Samarqand – Buxoro – Xiva” tezyurar temiryo‘l yo‘nalishini ishga tushirish hamda sayyohlarning transfer vaqtini qisqartirish maqsadida Urganch aeroporti bilan Xiva shahri o‘rtasida zamonaviy avtomobil yo‘lini qurish kabi infratuzilmaviy loyihalarga alohida e’tibor qaratildi.

Sessiyaning asosiy mavzusi yangi turistik mahsulotlarini yaratishga xizmat qiluvchi tarmoqlararo hamkorlikka bag‘ishlandi. Ishtirokchilar Xorazm viloyatida, YUNESKO obyekti yaqinida to‘laqonli ekotizimga ega bo‘lgan “Arda Khiva” sayyohlik klasterini ishga tushirish masalasini muhokama qildilar. Shuningdek, “UTair” aviakompaniyasi prezidenti O. Semyonov Rossiya hududlaridan Urganchga parvozlar dasturi kengaytirilishini va yangi reyslar yo‘lga qo‘yilishi yuzasidan rejalari haqida aytib o'tdi.