Toshkent, O‘zbekiston (UzDaily.uz) — Rossiya va O‘zbekiston o‘rtasida tovar-transport hujjatlari bo‘yicha transchegaraviy elektron hujjat aylanmasi (EHA) pilot loyihasi muvaffaqiyatli yakunlandi, deb xabar qildi Sankt-Peterburgdagi “Gazinformservis” masʼuliyati cheklangan jamiyati matbuot xizmati.

Loyiha operatorlari sifatida Rossiyaning “Tenzor” kompaniyasi va O‘zbekiston Davlat soliq qo‘mitasi huzuridagi «Yangi texnologiyalar» ilmiy-axborot markazi ishtirok etdi. Chet el elektron imzolarini tekshirish jarayonini “Gazinformservis” va Unicon.uz ilmiy-texnika va marketing tadqiqotlari markazi taʼminladi.

Loyihaning asosiy yutug‘i ikki mamlakat xo‘jalik subyektlari o‘rtasida tovar-transport elektron hujjatlari almashinuvida elektron imzolarni o‘zaro tan olish uchun tashkiliy, huquqiy va texnologik baza yaratilishi bo‘ldi. Bu tashqi iqtisodiy faoliyat ishtirokchilariga huquqiy ahamiyatga ega hujjatlar bilan elektron tarzda almashish imkonini beradi.

«Bu barcha logistika va moliyaviy jarayonlarni keskin tezlashtiradi: yuklarni jo‘natish, bitimlarni yakunlash va QQSni qaytarish jarayoni ancha tez amalga oshadi», — dedi “Tenzor” kompaniyasining EHA yo‘nalishi rahbari Yelena Zagrebova.

“Gazinformservis” tasdiqlovchi markazi boshlig‘i Sergey Kiryushkin taʼkidlashicha, elektron hujjatlardan nafaqat biznes tuzilmalar, balki mamlakatlar soliq organlari ham foydalanadi. Uning so‘zlariga ko‘ra, transchegaraviy EHAning qog‘oz hujjat aylanmasiga nisbatan asosiy afzalliklari — tezkorlik va samaradorlikdir: ikki tomonlama hujjatni elektron ko‘rinishda imzolash uchun bor-yo‘g‘i bir necha daqiqa kifoya qiladi.