“Rosatom”: O‘zbekistonda kichik quvvatli AES bo‘yicha loyiha hujjatlari 2025 yil oxirigacha tayyor bo‘ladi

Toshkent, O‘zbekiston (UzDaily.uz) — Rossiyaning davlat korporatsiyasi “Rosatom” 2025 yil oxirigacha O‘zbekistonda qurilayotgan kichik quvvatli atom elektrostansiyasi (AESMM) uchun loyiha hujjatlarini ishlab chiqishni yakunlab, uni buyurtmachi tomonga taqdim etadi. Bu haqda korporatsiya matbuot xizmati xabar berdi.

Hozirda Jizzax viloyatidagi bo‘lajak stansiya maydonida injenerlik tadqiqotlari olib borilmoqda, shuningdek, qurilish-montaj bazasi yaratilmoqda.

“Rosatom” maʼlumotiga ko‘ra, loyiha hujjatlari 2025 yil oxirigacha tayyorlanib, o‘zbek tomoniga topshiriladi.

Payshanba kuni bo‘lajak kichik quvvatli AES maydonida qurilish ishlarining boshlanishiga bag‘ishlangan tantanali marosim bo‘lib o‘tdi — texnika ilk kub metr tuproqni olib tashladi.

«Bugun O‘zbekistonda atom generatsiyasini yaratish bo‘yicha loyiha amalga oshirilishida yangi bosqich boshlanmoqda. “Rosatom”ning barcha xorijiy loyihalarida bo‘lgani kabi, kichik quvvatli stansiya qurilishida ham mahalliylashtirish darajasi yuqori bo‘ladi. Ishlarni o‘zbek subpudrat tashkilotlari amalga oshirmoqda. “Rosatom” kamida 60 yil xizmat qilish muddatiga ega stansiyani barpo etadi va uning faoliyati jarayonida har tomonlama qo‘llab-quvvatlaydi. Bizni o‘zaro foydali va samarali hamkorlikning uzoq yillari kutmoqda», — dedi davlat korporatsiyasi bosh direktori Aleksey Lixachyov.

O‘zbekistondagi birinchi atom elektrostansiyasini qurish bo‘yicha shartnoma 2024 yil 27 may kuni imzolangan edi. Loyiha doirasida Jizzax tumanida har biri 55 megavatt quvvatga ega olti reaktordan iborat kichik quvvatli AES barpo etilishi ko‘zda tutilgan.

Loyihaning bosh pudratchisi sifatida “Rosatom”ning injiniring divizioni tarkibiga kiruvchi “Atomstroyeksport” AJ faoliyat yuritmoqda. Shuningdek, loyihani amalga oshirishga mahalliy kompaniyalar, jumladan Enter Engineering ham jalb etilgan.

Rossiya Iqtisodiy rivojlanish vazirligi maʼlum qilishicha, 2025 yilda O‘zbekiston va Rossiya prezidentlari atom energetikasi sohasidagi hamkorlikni kengaytirish hamda mamlakatda ikki blokli yirik quvvatli AES va ikki blokli kichik quvvatli stansiya qurish bo‘yicha kelishuvga erishgan.