Toshkent, O‘zbekiston (UzDaily.uz) — Qoraqalpog‘iston Respublikasi Jo‘qarg‘i Kenesi raisi Amanbay Orinbayev boshchiligidagi delegatsiyaning Birlashgan Arab Amirliklariga amalga oshirgan ishchi tashrifi doirasida, O‘zbekistonning Misrdagi elchixonasi tashabbusi bilan, misrlik tadbirkor — Bell Energy kompaniyasi raisi Haysam Huseyn bilan uchrashuv bo‘lib o‘tdi. Bu haqda IA “Dunyo” xabar berdi.

Hamkorlik ruhida o‘tgan muzokaralar chog‘ida tomonlar Qoraqalpog‘istonning investitsiya salohiyati, iqtisodiy ko‘rsatkichlari va xalqaro loyihalarni amalga oshirish imkoniyatlari haqida fikr almashdilar. Xususan, Bell Energy kompaniyasining mintaqadagi loyihalarda ishtirok etishiga alohida eʼtibor qaratildi.

Muzokaralar yakunlarida Qoraqalpog‘iston Respublikasi Vazirlar Kengashi, Bell Energy kompaniyasi va uning biznes hamkorlari o‘rtasida umumiy qiymati 660 million dollarga teng bo‘lgan 5 ta o‘zaro anglashuv memorandumi imzolandi.

Imzolangan hujjatlarga muvofiq quyidagi yirik loyihalarni amalga oshirish ko‘zda tutilgan:

neft mahsulotlari uchun yer osti omborlari qurish,

“Qayraqtas” oltin kon maydonini o‘zlashtirish,

chiqindilardan energiya ishlab chiqarish,

bioetanol va aviayoqilg‘i ishlab chiqarish uchun bambuk plantatsiyalari tashkil etish,

bolalar farovonligini oshirishga qaratilgan ijtimoiy loyiha.

Tomonlar har bir loyihaning texnik va moliyaviy jihatlarini kelishib olish bo‘yicha ishlar davom ettirilishiga kelishib oldilar.