Qarshida 4 egizak qizaloq dunyoga keldi

Toshkent, O‘zbekiston (UzDaily.uz) — Kitob tumanilik Jasur Maqayev va Dilfuza Bahriddinova 5 nafar qizni katta orzu-havaslar bilan kamolga yetkazayotgandi. Yaqinda bu oilada bir yo‘la yana 4 qizaloq tug‘ildi. Natijada ushbu oila 9 qizli boy xonadonga aylandi.

Egizaklar Respublika ixtisoslashtirilgan ona va bola salomatligi ilmiy-amaliy tibbiyot markazining Qashqadaryo filialida muddatidan oldin kesarcha kesish amaliyoti orqali dunyoga keldi.

Yangi tug‘ilgan chaqaloqlarning og‘irligi va bo‘yi quyidagicha bo‘ldi: birinchi qizaloq vazni 1400 gr, bo‘yi 37 sm; ikkinchi qizaloq vazni 1450 gr, bo‘yi 38 sm; uchinchi egizakning vazni 1600 gr, bo‘yi 40 sm; to‘rtinchisining vazni 1400 gr, bo‘yi 37 sm.

Hozirda barcha chaqaloqlar mutaxassislar nazoratida bo‘lib, xalqaro tibbiy standartlarga muvofiq zarur parvarish bilan taʼminlanmoqda.