Prezident Mirziyoyev O‘zbekiston Ichki ishlar vazirligida kadrlar bo‘yicha o‘zgarishlar o‘tkazdi

Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyev Ichki ishlar vazirligida kadrlar almashinuvini amalga oshirdi.

Ayubxon Raxmatullayev boshqa ishga o‘tishi munosabati bilan Ichki ishlar vazirining birinchi o‘rinbosari — Tezkor-qidiruv departamenti boshlig‘i lavozimidan ozod etildi.

Davron Nazarmuxamedov Ichki ishlar vazirining o‘rinbosari — Maʼnaviy-maʼrifiy ishlar va kadrlar bilan taʼminlash departamenti boshlig‘i lavozimidan ozod etildi.

Ularning o‘rniga yangi rahbarlar tayinlandi. Botir Qudratxodjayev Ichki ishlar vazirining birinchi o‘rinbosari — Tezkor-qidiruv departamenti boshlig‘i lavozimiga tayinlandi. U mazkur tayinlovga qadar Favqulodda vaziyatlar vaziri lavozimida faoliyat yuritgan.

Rustam Djurayev Ichki ishlar vazirining birinchi o‘rinbosari — Jamoat xavfsizligi departamenti boshlig‘i lavozimiga tayinlandi. Shu bilan birga u O‘zbekiston Respublikasi Milliy gvardiyasi qo‘mondoni lavozimidan ozod etildi.

Rustam Mirzayev Ichki ishlar vazirining korrupsiyaga qarshi kurashish bo‘yicha komplayens va ichki nazorat masalalari bo‘yicha o‘rinbosari lavozimiga tayinlandi. Shu munosabat bilan u O‘zbekiston Respublikasi Prezidenti Administratsiyasi Kommunikatsiyalar departamenti boshlig‘ining o‘rinbosari lavozimidan ozod etildi.

Diyorbek Sattorov Ichki ishlar vazirining o‘rinbosari — Maʼnaviy-maʼrifiy ishlar va kadrlar bilan taʼminlash departamenti boshlig‘i lavozimiga tayinlandi. Shu bilan birga u O‘zbekiston Respublikasi Prezidenti Administratsiyasining Jamoat xavfsizligi va qonun ustuvorligi masalalari bo‘yicha departamenti sektori mudiri lavozimidan ozod etildi.

Shuningdek, O‘zbekiston Respublikasi Prezidenti Shavkat Mirziyoyev Azizxon Umarxonovni O‘zbekiston Respublikasi Ichki ishlar vazirligi huzuridagi Jazoni ijro etish departamenti boshlig‘i lavozimiga tayinladi. U mazkur tayinlovga qadar Olmazor tumani hokimi lavozimida ishlab kelgan.