Toshkentda 7-Xalqaro yoga konferensiyasi ochildi

Toshkent, O‘zbekiston (UzDaily.uz) — 2025 yil 17 sentyabr kuni Toshkent shahrida «Yoga yagona Yer – yagona Sog‘liq uchun» shiori ostida 7-Xalqaro yoga konferensiyasi va Markaziy Osiyoda ilk bor bunday tadbirning ochilish marosimi bo‘lib o‘tdi. Tadbir Hindistonning Madaniy aloqalar kengashi (ICCR) tomonidan, Hindistonning Toshkentdagi Elchixonasi va O‘zbekiston yoga federatsiyasi hamkorligida tashkil etildi.

Ochilish marosimida O‘zbekiston yoga federatsiyasi raisi Jahongir Artiqxo‘jayev, Sport vazirligi maslahatchisi Sharifjon Muminjonov, Hindiston elchisi Smita Pant, ICCR Bosh direktorining o‘rinbosari Abxay Kumar, shuningdek Hindistonning AYUSh vazirligi vakillari ishtirok etdilar. «Yoga va ong» mavzusida asosiy maʼruzani taniqli ekspert va maʼnaviy ustoz Shri M taqdim etdi.

Smita Pant o‘z nutqida O‘zbekistonda yogaga bo‘lgan qiziqish ortib borayotganini taʼkidlab, Hindistonning yoga mutaxassislari tayyorlash va salohiyatni rivojlantirishda qo‘llab-quvvatlashga tayyor ekanini bildirdi. U shuningdek, Jahon sog‘liqni saqlash tashkiloti tomonidan yoganing jismoniy va ruhiy salomatlikka foydasi eʼtirof etilganiga urg‘u berdi. ICCR Bosh direktorining o‘rinbosari Abxay Kumar bu konferensiya Markaziy Osiyoda ilk bor o‘tkazilayotganini, unda mintaqadagi o‘nta davlat vakillari qatnashishini qayd etib, tadbir yoshlar orasida yoga ommalashishiga turtki berishini bildirdi. Shri M o‘z chiqishida: «Yoga – bu ong deb ataladigan ko‘p qirrali hodisani o‘rganish uchun eng munosib vosita», – deb taʼkidladi.

Ikki kunlik konferensiyada Hindiston, O‘zbekiston, Qozog‘iston, Qirg‘iziston, Tojikiston, Turkmaniston, Gruziya, Armaniston, Mo‘g‘uliston va Rossiyadan ishtirokchilar qatnashmoqda. Dastur doirasida interaktiv plenar sessiyalar va panel muhokamalari o‘tkazilib, yoganing anʼanaviy va zamonaviy sog‘liqni saqlash tizimlariga integratsiyasi, uning surunkali kasalliklarni davolashdagi roli, kadrlar tayyorlash va malaka oshirish, shuningdek, yo‘nalishdagi eng so‘nggi tendensiyalar va innovatsiyalar muhokama etilmoqda.

Konferensiya yakunlangach, ishtirokchilarning tavsiyalari qatnashchi davlatlarning tegishli idoralariga yuborilib, keyingi amaliy choralar ko‘rish uchun ko‘rib chiqiladi.