Polshadagi vatandosh mehnat migrantlarining huquqlari himoyasi kuchaytiriladi

Toshkent, O‘zbekiston (UzDaily.uz) — O'zbekiston diplomatlari Polsha Davlat mehnat inspeksiyasi bosh inspektori o'rinbosari Urshula Langer uchrashdilar, deb xabar bermoqda "Dunyo" AA muxbiri.

Muloqot avvalida Polsha tomoniga O'zbekistonda migratsiya sohasini tartibga solish, xorijdagi hamyurtlarimiz huquqlarini munosib himoya qilishga qaratilgan vazifalar, davlatimiz rahbarimiz qarorlari va qonunchilik talablari hamda O'zbekiston Migratsiya agentligi faoliyati haqida batafsil ma'lumot berildi.

Polshada vaqtincha mehnat qilayotgan O'zbekiston fuqarolari huquq va manfaatlarini himoya qilish, noqonuniy mehnatni oldini olish, yurtimizdagi tegishli tashkilotlar bilan hamkorlik qilish va tajriba almashish masalalari muhokama qilindi.

Ushbu mamlakatdagi vatandoshlarimizning huquqiy kafolatlarini yana-da mustahkamlash, migratsiya sohasidagi qonunchilikni muvofiqlashtirish va uch tomonlama shartnomalar amaliyotini joriy etishga e'tibor qaratildi.

Bo'lib o'tgan uchrashuv yakunida o'zaro tajriba almashish va o'zbekistonlik mehnat muhojirlarining huquqlarini ta'minlash borasida hamkorlik qilishga kelishib olindi.