Pensiya jamg‘armasi «pensiyani oshirish» taklifi bilan qo‘ng‘iroq qilayotgan firibgarlardan ogohlantirmoqda

Toshkent, O‘zbekiston (UzDaily.uz) — Pensiya jamg‘armasi keksa yoshdagi fuqarolarni telefon orqali sodir etilayotgan firibgarlik holatlari haqida ogohlantirmoqda.

So‘nggi paytlarda nomaʼlum raqamlardan qo‘ng‘iroqlar ko‘payib, ularda firibgarlar go‘yoki pensiya yaqin vaqtda oshirilishi haqida xabar berib, bank kartasi yoki pasport maʼlumotlarini taqdim etishni talab qilmoqda.

Firibgarlar ko‘pincha o‘zlarini bank yoki Pensiya jamg‘armasi xodimi sifatida tanishtirib, shaxsiy maʼlumotlar berilmasa pensiya oshirilmasligi haqida aytib, fuqarolarni chalg‘itmoqda.

Pensiya jamg‘armasi barcha pensionerlarga murojaat qiladi: muassasa xodimlari hech qachon shaxsiy maʼlumotlar, bank kartasi rekvizitlari yoki SMS orqali kelgan kodlarni so‘rab qo‘ng‘iroq qilmaydi. Hech qanday holatda ushbu maʼlumotlarni begona shaxslarga bermang.

Shubhali qo‘ng‘iroqlarga duch kelinganda, darhol Pensiya jamg‘armasining ishonch telefoni 1271 raqamiga qo‘ng‘iroq qilish yoki ichki ishlar organlariga 102 raqami orqali murojaat etish lozim.

Hushyor bo‘ling va firibgarlarning nayranglariga uchmang.