Toshkent, O‘zbekiston (UzDaily.uz) — Xitoy Xalq Respublikasining Pekin shahrida O‘zbekiston–Xitoy savdo-iqtisodiy va investitsiya forumi bo‘lib o‘tdi.

Tadbirda viloyat hokimining o‘rinbosari - Investitsiyalar, sanoat va savdo boshqarmasi boshlig‘i Nuriddin Mamajonov boshchiligidagi viloyatimizdan 20 nafardan ortiq rasmiy va tadbirkorlardan iborat delegatsiya faol ishtirok etdi.

Forum doirasida Farg‘ona viloyatining iqtisodiy salohiyati va milliy qadriyatlarini namoyish etuvchi “Farg‘ona mahsulotlari” ko‘rgazmasi tashkil etildi. Unda mahalliy hunarmandlar yaratgan betakror yog‘och o‘ymakorligi namunalari, nafis keramika buyumlari, shifobaxsh quruq va yangi uzilgan mevalar, shuningdek, o‘zbek milliy matolari – atlas va adraslar taqdim etildi.

Ko‘rgazmada namoyish etilgan mahsulotlar xitoylik tadbirkorlarda katta qiziqish uyg‘otdi. Tadbir doirasida hujjatlar almashinuvi bo‘lib o‘tdi.