Payme qayta tashkil etishni boshladi va TBC Tech ni yaratadi

Toshkent, O‘zbekiston (UzDaily.uz) — To‘lov servisi Payme qayta tashkil etish jarayonini boshladi. Bu haqdagi maʼlumot 10 mart kuni openinfo.uz portalida eʼlon qilindi.

Qayta tashkil etish O‘zbekiston Respublikasining amaldagi qonunchiligiga muvofiq ajratib chiqarish shaklida amalga oshiriladi.

Payme bosh direktoriga barcha zarur huquqiy va tashkiliy harakatlarni amalga oshirish, jumladan TBC Tech nomli yangi yuridik shaxs ustavini tayyorlash, boshqaruv organlari tuzilmasini ishlab chiqish va boshqa tegishli hujjatlarni tayyorlash topshirildi.

TBC Uzbekistan matbuot xizmati UzDaily nashriga izoh berib, qayta tashkil etish tashabbuskori TBC Uzbekistan ekotizimining bosh kompaniyasi bo‘lgan TBC Digital ekanini maʼlum qildi.

Jarayon doirasida yangi yuridik shaxs — TBC Tech MCHJ tashkil etilishi ko‘zda tutilgan bo‘lib, u Payme ning texnologik aktivlarining bir qismi va jamoasini o‘z zimmasiga oladi.

TBC Uzbekistan taʼkidlashicha, mazkur qaror ekotizimni rivojlantirish bo‘yicha strategik rejaning bir qismi bo‘lib, biznes samaradorligi va masshtablanish imkoniyatlarini oshirishga qaratilgan.

Kompaniyada aytilishicha, qayta tashkil etishning joriy bosqichi ekotizimning IT funksiyalarini markazlashtirishga qaratilgan.

TBC Uzbekistan eslatishicha, ushbu strategiya doirasida avvalroq, 2025 yil kuzida ekotizimning operatsion funksiyalarini birlashtirgan TBC Operations kompaniyasi tashkil etilgan edi.

“TBC Tech ni ajratib chiqarish texnologik infratuzilmani rivojlantirishga kuchlarni jamlash, yangi servislarni joriy etishni tezlashtirish va raqamli moliyaviy xizmatlar sifatini oshirish imkonini beradi”, — deb qo‘shimcha qilindi TBC Uzbekistan da.

TBC Uzbekistan taʼkidlashicha, qayta tashkil etish faqat tashkiliy xususiyatga ega bo‘lib, Payme ning joriy faoliyatiga taʼsir ko‘rsatmaydi. Barcha servislar to‘liq hajmda ishlashda davom etmoqda, mijozlar va hamkorlar oldidagi majburiyatlar saqlanib qoladi.

Gruziyaning moliyaviy guruhi TBC Bank Group 2023 yilda Payme to‘lov tizimini sotib olish jarayonini to‘liq yakunlab, uning yagona egasiga aylangan. Dastlab 2019 yil aprelida TBC Bank Group kompaniya aksiyalarining 51 foizini sotib olgan edi. Keyinchalik, 2023 yil may oyida guruh qolgan 49 foiz aksiyani ham sotib olib, o‘z ulushini 100 foizga yetkazgan.