Oʻzbekiston va Xitoy iqtisodiy tajriba almashish dasturini ishga tushirdilar

Toshkent, O‘zbekiston (UzDaily.uz) — 1-dekabr kuni Pekin shahrida O‘zbekiston va XXR o‘rtasida iqtisodiy rivojlanish hamda tajriba almashish bo‘yicha Dastur o‘z ishini boshladi.

Mazkur dastur O‘zbekiston Investitsiyalar, sanoat va savdo vazirligi hamda XXRning Davlat taraqqiyot va islohotlar qo‘mitasi tomonidan birgalikda tashkil etildi.

Dastur institutsional hamkorlikni chuqurlashtirish, iqtisodiy islohotlar va sanoat sohasida Xitoy tajribasini o‘rganishga qaratilgan.

Shu kuni ISSV hamda Xitoy Davlat taraqqiyot va islohotlar qo‘mitasi o‘rtasidagi hamkorlik mexanizmi doirasida Ishchi guruhning navbatdagi yig‘ilishi bo‘lib o‘tdi.

Yig‘ilish Xitoy tomoni hamda O‘zbekiston delegatsiyasi ishtirokida vazir o‘rinbosari Ilzat Kasimov va Qo‘mita raisi o‘rinbosari Chjou Xaybin hamraisligida o‘tkazildi.

Uchrashuvda savdo, transport va logistika aloqalarini rivojlantirish, shuningdek, yirik infratuzilma loyihalarini, jumladan “O‘zbekiston - Qirg‘iziston - Xitoy” temir yo‘li qurilishini jadallashtirish masalasiga alohida e’tibor qaratildi.

Sun’iy intellekt sohasidagi hamkorlik istiqbollari, shuningdek, sun’iy yo‘ldosh texnologiyalarini rivojlantirish bo‘yicha qo‘shma ishlar, jumladan Markaziy Osiyoda “Beidou” tizimi mintaqaviy markazini tashkil etish tashabbusi muhokama qilindi.

Tadbirlar yakunida tomonlar strategik muloqot va amaliy hamkorlikni yanada kengaytirishga tayyor ekanliklarini tasdiqladilar.