Oʻzbekiston va Vengriya parlamentlararo hamkorlikni kengaytirish masalalarini muhokama qilishdi

Toshkent, O‘zbekiston (UzDaily.uz) — Oliy Majlis delegatsiyasining Vengriyaga tashrifi doirasida O‘zbekiston-Vengriya parlamentlararo do‘stlik guruhi va parlament qo‘mitalari o‘rtasida uchrashuv o‘tkazildi.

Uchrashuvda ikki mamlakat parlamentlari o‘rtasidagi hamkorlikni yanada rivojlantirish masalalari muhokama qilindi.

Suhbat chog‘ida O‘zbekiston parlament a’zolari Vengriya parlamenti bilan aloqalarni kengaytirishga yuqori darajadagi tayyorgarlik va qat’iy xohishini bildirdi. Vengriya Milliy Assambleyasining boy tajribasi, shuningdek, ushbu mamlakatning O‘zbekistonga nisbatan munosabati samimiyligi va do‘stona pozitsiyasi alohida e’tirof etildi.

Ta’kidlanganidek, O‘zbekiston ikki mamlakat o‘rtasida imzolangan bitimlarni izchil ta’minlash, parlament do‘stlik guruhlari faoliyatini jonlashtirish, qonun ijodkorligi, hududiy rivojlanish, ijtimoiy himoya, soliq siyosati va raqamlashtirish sohasida tajriba almashishga alohida e’tibor qaratadi.

So‘nggi yillarda O‘zbekiston va Vengriya o‘rtasida amaliy hamkorlik barcha yo‘nalishlarda barqaror rivojlanib borayotgani mamnuniyat bilan qayd etildi. Hukumat, vazirliklar, agentliklar va hududlar darajasida samarali muloqot yo‘lga qo‘yilgan bo‘lib, ikki davlat BMT, Turkiy davlatlar tashkiloti va boshqa xalqaro tuzilmalar doirasida hamkorlikni davom ettirmoqda.

Mamlakatlarning o‘zaro savdo hajmining o‘sishi, qo‘shma korxonalar soni ko‘payishi va iqtisodiyotning qator sohalarida kooperatsiya kengayib borayotgani alohida ta’kidlandi. Shu boisdan O‘zbekiston-Vengriya biznes kengashining navbatdagi yig‘ilishini keng doiradagi ishbilarmonlar ishtirokida o‘tkazish taklifi bildirildi.

2024-yil oktabr oyida Qo‘qon shahrida bo‘lib o‘tgan Birinchi hududlar forumining natijalari yuqori baholandi. Hududlararo hamkorlikni yanada jadallashtirish maqsadida 2026-yil boshida Budapesht shahrida Ikkinchi forumni o‘tkazish taklif etildi hamda hududlar o‘rtasidagi o‘zaro aloqalarni kengaytirishga alohida e’tibor qaratildi.

Madaniy-gumanitar sohadagi hamkorlik ham izchil rivojlanmoqda. 2024-yil oktabrda Lakitelek shahrida buyuk mutafakkir Alisher Navoiy byustining ochilishi, 2025-yil yanvarda Budapeshtda O‘zbekiston kino kunlarining o‘tkazilishi ikki mamlakat xalqlarini yanada yaqinlashtirayotgani ta’kidlandi.

O‘zbekiston parlament a’zolari Vengriyaning “Stipendium Hungaricum” dasturi doirasida har yili 200 nafar talaba uchun ajratilayotgan grantlarni yuqori baholadi va ta’lim sohasidagi hamkorlikni yanada kengaytirishga tayyorligini bildirdi. Shu jumladan, 2026 yil mart oyida III O‘zbekiston-Vengriya rektorlari forumini o‘tkazish, qo‘shma ikki diplomli dasturlarni amalga oshirish bo‘yicha tashabbuslar qo‘llab-quvvatlandi.

Uchrashuvda biznes, turizm va madaniy almashinuvlarni rag‘batlantirish maqsadida ikki mamlakat o‘rtasida to‘g‘ridan-to‘g‘ri aviaqatnovlarni kengaytirish masalasi ham ko‘rib chiqildi.